حکوومەتا ئیراقێ، ئۆپەراسیۆنا لەشکەری یا ئارتێشا ترکیێ ل ھەرێما کوردستانێ شەرمەزار دکەت و وێ ب بنپێکرنا سەروەریا خاکا ئیراقێ و ل دژی پەیمان و یاسایێن ناڤدەولەتی دزانیت.
بەردەڤکێ وەزارەتا دەرڤەیا ئیراقێ «ئەحمەد سەفاح» د داخویانیەکێ دا راگھاند کو حکوومەتا ئیراقێ ئۆپەراسیۆنا لەشکەری یا ترکیێ ب رێیا ھەلیکۆپتەرێن «ئاتاک» و فرۆکەیێن بێفرۆکڤان ل ناڤچەیێن مەتینا، زاب، ئاڤاشین و باسیان ب توندی رەد و شەرمەزار دکەت.
سەفاح گۆت ژی: “ئیراق ڤێ ئۆپەراسیۆنێ، ب بنپێکرنا سەروەری و رێزنەگرتنا ل دەولەتێ دزانیت و ئەڤە ل دژی پەیمان و یاسایێن ناڤدەولەتییە. ھەروەھا ئەڤ ئۆپەراسیۆن ل دژی پەرەنسیپێن جیرانەتیا باشە.”
تەکەز کر ژی، حکوومەتا ئیراقێ رێ نادەت خاکا وێ ژ بۆ گھاندنا زیانێ ب وەلاتێن جیران بهێتە بکارئانین و رەد دکەت کو ئریاق ببیتە مەیدانا یەکالیکرنا ناکۆکیێن ناڤدەولەتی.
ئەڤ داخویانیا بەردەڤکێ وەزارەتا دەرڤەیا ئیراقێ ئەحمەد سەفاح د دەمەکێ دایە، دوھی ئارتێشا ترکیێ ل ناڤچەیێن چیایی یێن مەتینا، زاپ، ئاڤاشین و باسیان ژ ئاسیمان و بەژاھی ڤە ل دژی پەکەکێ دەست ب ئۆپەراسیۆنێ کربوو.
