ئەندامێ ھەڤسەرۆکاتیا پەیەدێ، ئالدار خەلیل دەربارێ ئالۆزیێن ل قامشلۆ یێن د ناڤبەرا رێڤەبەریا خوەسەر و سازیێن حکوومەتا سووریێ دا هەیی داخویانیەک دا و تێدا دبێژیت: مە چ نییەت نینە کو ئەم حکوومەتا سوریێ ژ قامشلۆ دەربێخین.
ئالدار خەلیل یەک ژ وان کەسانە کو سیاسەتا قەندیل ل رۆژئاڤایێ کوردستانێ رێڤە دبەت و راستە راست گرێدایێ قەندیلێ یە.
ئالدار خەلیل د دەربارێ ھندەک ئالۆزیێن د ناڤبەرا ھێزێن رەژیمێ و چەکدارێن پەیەدێ دا روودایی دا دبێژیت: رێڤەبەریا خوەسەر سەرەرای کو ئەگەر بخوازیت دکاریت د دەمەکێ کورت دا وان ژ وێرێ (قامشلۆ و حەسەکێ) دربێخیت. ژ بۆ چ نەکر؟ ئەڤە پەیامەکا سیاسییە. وەکی پەیامەکێیە کو ببێژت “ئەز سووریێ پارچە ناکەم، یەکتیا سووریێ دخوازم” و ھەر وھا ژ بۆ رێیێن دیالۆگێ بمینن، ئەم بکارن رێکەفتنێ بکەین کو زەمینەک بمینیت. ژ بەر وێ ھەیا نھا ئەڤ سازیێن ئەولەھیێ ل قامشلۆ و حەسەکێ ھەنە. تو بریارەکا سیاسی کو کەسەک وان ژ وێرێ دەربێخیت، نھا نینە. دەما حکوومەتا شامێ حەلەب و شەھبایێ دۆرپێچ دکەت، ھەری کێم دڤێ ڤێ ببینن “ھوون ل وێرێ دخوازن گەلێ مە برسی بکەن، ل ڤێرە ژی سازیێن وە ھەنە و ئەم ژی دکارین ڤێ بکەین.” گەر ھەیا نھا مە نەکربیت، ژ بەر کو مە نەخواستیە، مە نەکریە. لێ ھەگەر ببێژن “نا ب ئیسرار ئەم دێ بکەین” وێ دەمێ ئەم ژی دکارین ڤێ پەیامێ بگەھنین؛ “ھەبوونا وە د ناڤا ھەرێمێن مە دایە.”
د بەردەوامیا داخوویانیا خوە دا ئالدار خەلیل دبێژیت: بلا ھەر کەس بزانیت گەر گەلێ مە د ناڤا دۆرپێچێ دا بیت، ئەم نکارین لێ تەماشە بکەین. ئەڤە نە د ئالیێ مرۆڤی دا، نە د ئالیێ قەبوولکرنا راستیێ دا، نە ژی د ئالیێ سیاسی دا دهێتە قەبوولکرن. رێڤەبەریا خوەسەر چ نییەتەک نینە کو حکوومەتا شامێ ژ جھێ وێ دەربێخیت یان ژی شەری ل دژی وێ رابگەهینیت. تەنێ ھەولدانەکە ژ بۆ رۆژەڤکرنا مژارا دۆرپێچێ کو ببیتە ھەولدانەک ژ بۆ چارەسەرکرنا پرسگرێکێ.
وەک دن ژی ئالدار خەلیل دبێژیت کو، ئەو دخوازن ل گەل رەژیما سوریێ رێبکەڤن، لێ ھندەک ئالی ڤێ یەکێ ئاستەنگ دکەن.
