رێخستنێن پارتییا یه‌كێتییا ده‌مۆكراتیك په‌یه‌دێ ل هن باژارێن رۆژئاڤا كوردستانێ كه‌تنه لڤ و ته‌ڤگه‌رێ و ل مالان دگه‌رن ژ بۆ سته‌ندنا زه‌كاتا سه‌رفترێ ژ هه‌مولاتییان.
چاڤكانیێن پێگه‌ها داركا مازی ل رۆژئاڤا كوردستانێ ئه‌شكه‌ره كر، ل باژارێ دێركێ كادرۆیێن په‌یه‌دێ ل مالا دگه‌رن ژ بۆی كۆم كرنا زه‌كاتا سه‌رفترێ و ژ هه‌ر ماله‌كێ كوژمێ 5 هه‌زار لیرێ سووری دستینن.
ده‌ست نیشان كر، كادرۆیێ په‌یه‌دێ یێ ب ناڤێ حه‌مزه محه‌مه‌د كو ژ گوندێ حه‌مزه به‌گه و ژ شێنیێن دێركێ یه، ئه‌و به‌رپرسێ كۆمیتا شه‌هید محی الدین یا گرێدای په‌یه‌دێ یه، وی دوهـ رۆژا 18/4/2022ێ ده‌ست ب سه‌ردانا مالان كرییه ژ بۆی وه‌گرتنا زه‌كاتا سه‌رفترێ.
ل گۆری ئاگاهیێن ده‌ستێ مه، په‌یه‌دێ ب شێنیێن دێركێ گۆتییه كو ئه‌و زه‌كاتێن وان وێ ل سه‌ر مالباتێن شه‌هیدان بێن پارڤه‌كرن.
هێژای گۆتنێ یه، پاش كو هن ژ چاڤكانیێن په‌ترۆلێ ژ ده‌ستێ په‌یه‌دێ و رێڤه‌به‌رییا خوه‌سه‌ر هاتنه ده‌رخستن و راسته راست كه‌تنه ژێر ده‌ستهلاتا ئامه‌ریكییان، ره‌وشا دارایی یا په‌یه‌دێ خه‌راب بوویه، لوما وێ ژی وه‌كه باسكێ رۆژئاڤا كوردستانێ یێ په‌كه‌كێ په‌نا ژ بۆ ب زۆر سته‌ندنا په‌ره‌یان ژ هه‌مولاتییان برییه، وه‌كه سته‌ندنا باجێ ژ خوه‌دی كار، تجار و بزنزمه‌نان و هه‌روه‌ها سته‌ندنا په‌ره‌یان ل ژێر ناڤێ مه‌هانه و ئابۆنه‌یێن پارتیێ، ئیرۆ ژی په‌یه‌ده هاتییه و د مه‌ها ره‌مه‌زانا پیرۆز ده زه‌كاتێ ب دارێ زۆرێ ژ شێنیێن باژێرێ دێركێ دستینه و دبێژه ئه‌مێ بدن مالباتێن شه‌هیدان.
