سەره‌دانا سەرۆکوەزیرێ هەرێما کوردستانێ، مەسروور بارزانی بۆ بریتانیایێ د رویته‌رزێ دا جهـ گرت، رویته‌رزێ تەکەز کریە کو بنگەها سەره‌دانێ «گرێدایی دەستپێکا ئەنەرژیێ» یە.
رویته‌رزێ د راپۆرتا خوە دا گۆتیە: “سەرۆکوەزیرێ کورد مەسروور بارزانی، ل گه‌ل لیدەرێ ئینگلیستانێ بۆریس جۆنسۆن، ل سەر ئیخراجاتا ئەنەرژیێ ژ بۆ ئەورۆپایێ و کێمکرنا پشتبه‌ستنا ب پەترۆل و گازا رووسیایێ ئاخڤین”.
دەربارێ جڤینا ناڤبەرا هەر دو ئالیان، “سەرۆکوەزیر بارزانی بەحسا خوەستەکا هناردەکرنا ئەنەرژیێ بۆ ئەورۆپایێ کر و سەرۆکوەزیر جۆنسۆن پەسنا هەولدانێن رۆژئاڤا یێن ژ بۆ کێمکرنا پێبەندبوونا ب پەترۆل و گازا رووسیایێ دا.
سەرۆکوەزیرێ هەرێما کوردستانێ، د سەره‌دانا خوە یا بەریا دو رۆژانا ل له‌نده‌نێ دا، ل گه‌ل سەرۆکوەزیر، وەزیر و سیاسەتمەدارێن گرنگێن بریتانیایێ روونشت، ئه‌ڤ سەره‌دان کو د چاپەمەنیا بریتانیایێ دا ب بەرفرەهی هاتبوو راگهاندن.
ئۆفیسا سەرۆکوەزیرێ بریتانیایێ بۆریس جۆنسۆن راگهاند کو جڤینا بارزانی و جۆنسۆن دەرفەتەک ئافراندیە دا کو په‌یوه‌ندیێن د ناڤبەرا بریتانیا و هەرێما کوردستانێ دە بەرفرەهتر ببن.
داونینگ ستریت دیار کر کو بریتانیا و هەرێما کوردستانێ خوەدی په‌یوه‌ندیێن دیرۆکی نە و دەرفەتێن بەرفرەهکرنا تێکلیێن بازرگانی و وه‌به‌رهێنانێ یێن دوئالی ئافراندیە.
