شانده‌كێ ئه‌وله‌هییا ئیراقێ ئیرۆ ب سه‌رپه‌رشتییا سه‌رۆكئه‌ركانێ ئارتێشا ئیراقێ، گه‌هشت شه‌نگالێ، ئه‌ڤ سه‌ره‌دان پاش ئالۆزیێن رۆژێن رابووری تێ كو ل نێڤبه‌را ئارتێشا ئیراقێ و په‌كه‌كێ دا ده‌ركه‌تبوو.
ئیرۆ رۆژا پێنجشەمبێ، 21/4/2022، ب مەبەستا دیتنا رەوشا کو چەند رۆژن ل شنگالێ دەرکەتیە، شاندەکە کو ژ شێورمەندێ ئاساییشا نشتمانی قاسم ئەل ئەعرەجی، جیگرێ فەرماندارێ ئۆپەراسیۆنێن هەڤبەش رەشید یاروللا، رێڤەبەرێ ئیستخباراتا لەشکەری عەبدولەمیر ئەل شەمری و فەرماندارێ هێزێن بەژاهی قاسم محەمەد پێک دهات، گه‌هشت ناڤچەیا شنگالێ.
گه‌هشتنا ڤێ شاندێ د دەمەکێ دا یە کو 4 رۆژن ئالۆزیێن ناڤبەرا په‌كه‌كێ و هێزێن ئەولەهیێ یێن ئیراقێ بەردەوامن و چەکدارێن په‌كه‌كێ ل ناڤچه‌یا سنوونێ و کۆمەلگەهێن سەر ب ناڤچه‌یێ ڤه رەوشەکە تایبەت دەرخستییە.
پشتی ئالۆزی و رووبرووبوونێن دو رۆژێن رابووری یێن د ناڤبەرا په‌كه‌كێ و هێزێن ئەولەهیێ یێن ئیراقێ دا، کو 5 کەس بریندار بوون، رێکەفتنەکە سێ خالی د ناڤبەرا هەردو ئالیان دا هاتیە ئیمزاکرن، ل گۆر رێکەفتنێ، دڤێت په‌كه‌كه بارەگەهێن خوە ژ جهێن نیشتەجیبوونێ ببن دەرڤە و بارەگەهێن خوە یێن سەر رێكێن سەرەکی رادەستی هێزێن ئیراقێ بکن و هەول نەدە هێزێن خوە ب سەر هێزێن ئەولەهیێ یێن ئیراقێ دا بسەپینیت، لێ بەلێ هەتا نها په‌كه‌كه پابەندی وێ رێکەفتنێ نەبوویە و رەوش ئالۆزتره.
