ئارتێشا ئیراقێ دەست دانا سەر بنکەیەکێ پەکەکێ

ئارتێشا ئیراقێ ل شنگالێ دەست دانا سەر خالەکا یەکینەیێن بەرخوەدانا شنگالێ (یەبەشێ) یا سەر ب پەکەکێ و دو چەکدار دەستەسەر کرن.

ل گۆر زانیاریێن چەند چاڤکانیێن مەدیایا ئیراقێ، “ل شنگالێ ھێزێن ئارتێشا ئیراقێ دەست دانا سەر بارەگەھەکێ یەکینەیێن بەرخوەدانا شنگالێ (یەبەشێ) یا سەر ب پەکەکێ”.

ھەروھا ھاتیە دیارکرن، “دو چەکدارێن پەکەکێ ھاتن دەستەسەرکرن و ھەژمارەک چەکدارێن دن کارینە بەر ب جھەکی نەدیار برەڤن”.

مەدیایا ئیراقێ ئەشکەرە دکەت، “ئۆپەراسیۆنا ئارتێشا ئیراقێ ل شنگالێ بەردەوامە ژ بۆ بداوی ئانینا ھەبوونا پەکەکێ ل وان دەڤەران”.

چەند رۆژن ئالۆزی د ناڤبەرا ئارتێشا ئیراقێ و ھێزێن سەر ب پەکەکێ دا دەرکەتنە ھۆلێ، چەند ئالی و سەرکردەیێن ئیراقێ ژی تەکەز دکەن کو ژ بۆ پێک ئانینا ئاساییش و ئارامیێ ل ناڤچەیێ، دڤێت ھێزێن سەر ب پەکەکێ بهێنە دەرخستن.