ئیبراھیم برۆ: ھەموو ھێزێن رێڤەبەریا خوەسەر بریارێن خوە ژ کادرۆیێن پەکەکێ وەردگرن

ئیبراھیم برۆ: ھەموو ھێزێن رێڤەبەریا خوەسەر بریارێن خوە ژ کادرۆیێن پەکەکێ وەردگرن

ئەندامێ کۆمیتەیا دەرڤەیا «ئەنەکەسێ» ئیبراھیم برۆ دەربارێ ئێریشێن ل سەر بارەگەھ و ئۆفیسێن ئەنەکەسێ دا رادگەھینیت، ھەر دەما کو ژ ئالیێ ئامەریکی ڤە نیشان ژ بۆ دەستپێکرنا دانووستاندنێن د ناڤبەرا ئەنەکەسێ و پەیەنەکێ دا تێن دایین، پەکەکە ئێریشی سەر ئۆفیسێن ئەنەکەسێ دکەت و ئەندامێن وێ دگریت.

ئەندامێ کۆمیتەیا دەرڤەیا ئەنەکەسێ ئیبراھیم برۆ دەربارێ ئێریشێن ل سەر ئۆفیسێن ئەنەکەسێ و پارتیێن د ناڤا وێ دا راگھاند، ژ سالا 2013ێ ڤە، ھێزێن سەر ب پەیەدێ ب دەھان جاران ئۆفیسێن مە شەوتاندنە و گرتنە و ئەندامێن ئەنەکەسێ رەڤاندنە و کوشتنە. لێ دو سالن کو دانووستاندن د ناڤبەرا ئەنەکەسێ و پەیەنەکێ دهێتە کرن، ھەر دەما کو ژ ئالیێ ئامەریکی ڤە نیشان ژ بۆ دەستپێکرنا دانووستاندنێن د ناڤبەرا ئەنەکەسێ و پەیەنەکێ دا تێن دایین، پەکەکە ئێریشی سەر ئۆفیسێن ئەنەکەسێ دکەت و ئەندامێن وێ دگریت، ژ بۆ دانووستاندنێن یەکرێزیا ناڤمالا کوردی تێک ببەت.

دەربارێ داخویانیا ئاسایشا ل رۆژئاڤایێ کوردستانێ دا کو گۆتبوو کەسێن نەناس ئێریشی سەر ئۆفیسێن ئەنەکەسێ کرنە، برۆ گۆت، بەری دو رۆژان پەیەدێ ب خوە د داخویانیەکێ دا گۆتبوو کو ئەنەکەسە و پارتیێن وێ خایینن و دڤێت ئەو بهێنە جەزاکرن و ھەروھا ھاندانێ ژ بۆ کریارێن وەھا دکەت. ئاسایش ژی دبێژیت کو کەسێن نەناس ئەڤ ئێریش کرنە. ل داویێ، ھێزێن چەکدارێن سەر ب پەیەدێ ڤان ئێریشان دکەن و ھێزەکا وێ یا دن ژی دبێیت کو ئەو ئۆفیسان دپارێزن. ل داویێ ژی ھەموو ھێزێن رێڤەبەریا خوەسەر، بریارێن خوە ژ کادرۆیێن پەکەکێ وەردگرن.

برۆ گۆت: پەکەکە 40 سالن شەری دکەت و سیاسەتەکێ دمەشینیت ژ بۆ کورد ل باکور ل ھەرێمێن خوە نەمینن. ل باشوور ژی ب سەدان گوند ڤالا کرنە و ل رۆژاڤا ژی، نیڤا گەلێ مە کۆچبەر بوویە.

دەربارێ داخویانیا بالیۆزخانەیا ئامەریکی ل شامێ یا ل سەر شەوستاندنا ئۆفیسێن ئەنەکەسێ دا کو دلگرانیا خوە ژ ئێریشان نیشان دابوو، برۆ گۆت: داخویانیا بالیۆزخانەیا ئامەریکی گاڤەکا باشە، لێ چارەسەری ب ڤی ئاوایی نابیت. ئالیێ ئامەریکی گەرەنتیکارێ دانووستاندنێن یەکرێزیێیە و دڤێت ئەو ب بەرپرساتیا خوە رابن و کارەکی باشتر ل ھەمبەر ڤان کریان ئەنجام بدەت.

پوستێن ھەمان بەش