ئێرشا ل سەر ھەولێرێ یا مووشەکی، سەردانا سەرۆکوەزیر مەسروور بارزانی بۆ بریتانیایێ و مژارا ئالتەرناتیفبوونا ئەنەرژیا ھەرێما کوردستانێ بۆ ئەورۆپایێ و بانگەشەیێن رەشکرنێ یێن بۆ ھەرێما کوردستانێ ب ھەڤ ڤە تێن گرێدان و مافناسێن باکورێ کوردستانێ بانگا خوەدیلێدەرکەتنا ھەرێما کوردستانێ دکن و دبێژن، قەت نایێ قەبوولکرن کو ھەرێما کوردستانێ وەرە رەشکرن.
پشتی ئۆپەراسیۆنا رووسیایێ یا ل سەر ئوکراینایێ ناتۆ، ئامەریکا و یەکیتیا ئەورۆپایێ سزا دانین سەر رووسیایێ و خوەستن پشتبەستنا ئەورۆپایێ یا سەر ئەنەرژیا رووسیایێ ژی ژ ھۆلێ راکن و ھەرێما کوردستانێ وەک ئالتەرناتف ھات رۆژەڤێ کو پشتی ئەڤ رەوش پەیدا بوو ب مووشەکان ژ ئالیێ ئیرانێ ڤە ئێریشی ھەولێرێ ھات کرن. لێ ھەرێما کوردستانێ ل سەر رێبازا دیپلۆماسیێ پۆلتکایا خوە مەشاند و سەرۆکێ حکوومەتا ھەرێما کوردستانێ مەسروور بارزانی ل گەل وەلاتێن رۆژھلاتا ناڤین، لگەل ترکیێ و لگەل بریتانیایێ ھەڤدیتن پێک ئانی و وەک ئاکتۆرەک ب باندۆر دەرکەت پێش کو پشتی ڤێ رەوشێ ژی ڤێ جارێ بانگەشەیێن رەشکرنێ ل ھەمبەر ھەرێما کوردستانێ ھاتن مەشاندن.
مافناسێن باکورێ کوردستانێ ژی بانگ دکن کو دڤێ ھەر کوردەک ب دیپلۆماسیا ھەرێما کوردستانێ سەربلند بە و مافناسێن «ردڤان دالمش» دبێژیت ھەرێما کوردستانێ وەک وەلاتەکێ دەمۆکراتیک د رێیا رەوا دا دمەشیت.
مافناس «ردڤان دالمش» ژ K24ێ را دیار کر: “ل ھەرێما کوردستانێ ستانداردێن وەلاتێن دەمۆکراتیک ھەنە. مافێ ئازادیا رامانێ ھەیە، مافێ ئاڤاکرنا پارتیان ھەیە، مافێ بەشداریا ھلبژارتنێ ھەیە، مافێ ئاڤاکرنا کۆمەلەیان ھەیە، مافێ ئاڤاکرنا وەقفان ھەیە، مافێ ئاخافتنێ ھەیە. ئەڤ تەیبەتمەندیێن جڤاکا سیڤیلە. دبە کو کێماسی ھەبن و بهێنە رەخنەکرن، لێ ژ بەر کو مە دەولەتەک ھەیە سەر رویێ ئەردێ دڤێ ئەم خوەدی لێ دەربکەڤن.”
مافناسێن کورد دبێژن بانگەشەیێن رەشکرنێ یێن ھەمبەر ھەرێما کوردستانێ ژ ئالیێ ھێزێن کو نکارن راستەراست ئێریشی ھەرێما کوردستانێ بکن ڤە تێن کرن.
مافناس «فەخری کاراکۆیونلو» دبێژیت، د ڤێ سەردەما کو رۆژھلاتا ناڤین ئالۆز و ئەورۆپا بەر شەری دایە دیپلۆماسیا سەرکەفتییا ھەرێما کوردستانێ ژ بۆ ھەر کوردەک سەربلندییە.
«فەخری کاراکۆیونلو» ژ K24ێ را دەستنیشان کر: “داگیرکەر ژ بۆ کو بگھیژن ئارمانجێن خوە، داگیرکەریێ تەنێ ناکن. د ھەمان دەمێ دا ئاموورێن ب باندۆر ب کار تینن. یەک ژ وان ئامووران ژی ئەوە کو ھێزەکێ ژ ناڤا خاکا داگیربوویی دەردخیت و ب ناڤێ خاکا داگیربوویی وێ ھێزێ ب کار تینیت.”
مافناس د وێ باوەریێ دا نە کو بریتانیایا د شەرێ یەکەما جیھانێ دا و د شەرێ دویەما جیھانێ دا ل سەر دیارکرنا نەخشەیان ب باندۆر بوو ئیرۆ ژی ھەمان باندۆر و ھێزا خوە دپارێزیت و گرینگ و ھێژایە کو د رەوشا ئیرۆیا جیھان بەر ب قۆناغەکا نوو ڤە دچیت دا بریتانیا ل گەل سەرۆکوەزیر و وەزیرێن خوە پێشوازیێ ل سەرۆکێ حکوومەتا ھەرێما کوردستانێ مەسروور بارزانی دکەت.
