فەرماندەیەکی پێشمەرگە ل شنگالێ دبێژیت، ئەوا کو پەکەکە و ھێزێن گرێدایی وێ ل شنگالێ دکن، کۆمکوژیا کوردێن ئێزیدییە.
فەرماندەیێ پێشمەرگە ل شنگالێ، قاسم دربۆ راگهاند، چەکدار و ھێزێن گرێدایی پەکەکێ یێن ل شنگالێ نکارن تشتەکێ بێژن عەرەبان تەنێ کوردێن ئێزیدی خستنە بن کۆنترۆلا خوە و زلمێ ل وان دکن.
قاسم دربۆ ھەر وھا گۆت، ئەوا کو پەکەکە و ھێزێن گرێدایی وێ دکن، جینۆسایدا کوردێن ئێزیدییە. ئارمانجا وان ئەوە ئێزیدی ل شنگالێ نەمینن.
ب گۆتنا وی فەرماندەیێ پێشمەرگە، پەکەکە ھەموو ھەولێن خوە ددەت دا کو ئێزیدی ڤەنەگەرن سەر مال و وارێ خوە. ب تایبەت ل خانەسۆر، سنوونێ، سیبا شێخدر و چیایێ شنگالێ، چەکدارێن پەکەکێ سەردەستن و ناھێلن خەلک ب دلێ خوە بژیت.
قاسم دربۆ دا زانین ژی، ژ سالا 2014ێ ڤە ھەتا نھا تشتەکێ باش بۆ شنگالێ نەھاتیە کرن ژ بەر کو کۆم و ھێزێن نەیاسایی رێ نادەن. بەغدا ژی پشتەڤانیا ئارامی و ئاڤەدانیا شنگالێ ناکەت. رەوش گھیشتیە وێ ئاستێ کو چەکدارێن پەکەکێ ھێزێن ئیراقی دیل دگرن.
وی فەرماندەیێ پێشمەرگە ئانی زمان، ھێزێن پەکەکێ ناخوازن و ناھێلن سینۆرێ ناڤبەرا ئیراق و سووریێ دا بهێتە گرتن دا کو بکاربن ھاتنچوونێ بکن د ناڤبەرا شنگال و رۆژئاڤایێ کوردستانێ دا.
قاسم دربۆ بەحسا مەترسیا ترکیێ ل سەر شنگالێ ژی کر و گۆت، ئەم دترسین ترکیا ژ بەر پەکەکێ ئێرشی شنگالێ بکەت وێ چاخێ خەلکێ ئێزیدی دێ باجەک مەزن دەن. ژ بەر کو پەکەکە تەنێ ل ناڤ گوند و دەڤەرێن ئێزیدیان دا بجیھ بوویە نە ل دەڤەرێن دن.
ب گۆتنا دربۆ، زێدەتری 8 سالانە مالباتێن ئێزیدی یێن کو ژ بەر ئێرشێن داعشێ ئاوارە بوونە، نکارن ڤەگەرن سەر جھ و وارێ خوە لێ مالباتێن داعشێ یێن کو ئێزیدی جینۆساید کری، ڤەدگەرن و ژیانەک خوەش ژی دژین. قیمەتا وان ژی ژ ئێزیدیان زێدەترە!
