سەرۆکێ ئەنجوومەنا پارێزگەھا دوھۆکێ شەرێ د ناڤبەرا پەکەکێ و ترکیێ دا بێ ئارمانج ب ناڤ کر و گۆت: “نە پەکەکە دزانە چ دخوازیت و نە ژی ترکیا ئارمانجەکا ئاشکەرا ھەیە و ئەڤ شەرە پلانەکە ژ بۆ تێکدانا رەوشا ھەرێما کوردستانێ.”
سەرۆکێ ئەنجوومەنا پارێزگەھا دوھۆکێ «فەھیم عەبدولا» داخویانیەک دا رووداوێ و دبێژیت: “ئۆپەراسیۆنا ترکیێ باندۆرەکا گەلەک خراب ل سەر دەڤەرێن سینۆری یێن پارێزگەھا دوھۆکێ و باکورێ کوردستانێ کریە.”
فەھیم عەبدولا دەستنیشان کر کو وێرانبوونا ھندەک گوندێن دەڤەرێ ڤەدگەریتە دەما ئەنفالێ و ئانی زمان، “پشتی ڤالاکرنا ڤان دەڤەران ژ خەلکێ سڤیل، پەکەکە ب ھەماھەنگیا دەستھلاتا بەعس یا ھلوەشیایی جھێ خوە د وان گوندان دا قایم کر و ھەتا ئیرۆ ژی ئەڤ گوندە ژ نوو ڤە نەھاتنە ئاڤاکرن، خزمەت نەگھیشتنە وان دەران و خەلکێ وان گوندان ژی نکارن ڤەگەرن ناڤ گوندێن خوە.”
فەھیم عەبدولا ھەر وھا دیار کر کو شەر بەردەوامە و باندۆر ل دەڤەرێن دن یێن نە د قادا شەری دا ژی دکەت و دبیتە سەدەم کو ئەو بێنە ڤالاکرن ژ بەر کو شێنی خوە د ئەولەھیێ دا نابینن و گۆت، “ھەتا نھا زێدەتری 400 گوندێن سینۆری یێن پارێزگەھا دوھۆکێ ھاتنە ڤالاکرن کو پرانیا وان د ناڤ سینۆرێن رێڤەبەریا سەربخوەیا زاخۆیێ دا نە.”
سەرۆکێ ئەنجوومەنا پارێزگەھا دوھۆکێ دیار کر، کۆمیتەیەک ھاتیە دامەزراندن دا کو لێکۆلینان ل سەر زیانێن وان دەڤەرێن شەر تێدا بکەت و ئانی زمان، “دەما کو وەلاتەک تێ داگیرکرن تەر و هشک ب ھەڤ را دشەوتن و دەڤەرا مە ژی بوویە مەیدانا شەرەکی بێ ئەنجام کو نزانی چاوا شیرۆڤە بکی. خویایە کو پلانەکا ھەڤبەش د ناڤبەرا وان دا هەیە بۆ وێرانکرنا دەڤەرا مە و تەنێ ئەوێن کو زیان دگەهیتێ گوندیێن مە نە.”
ژینگەھ د بن ئاگری دایە
فەهیم عەبدولا گۆت، “زییانێن ھەری مەزن یێن کو دبیت زوو ب زوو نەهێن قەرەبووکرن ئەوە کو؛ ژینگەھا مە تێک چوو و دارستان و چێرگەھێن مە ھەموو د بن ئاگری دا نە.””
فەھیم عەبدولا ل سەر قەرەبووکرنا زییان ڤێ کەتیێن شەرێ پەکەکە و ترکیێ دیار کو ئەڤە نە شەرێ گەلێ مەیە و پارلامەنتەرێن کوردستانێ یێن د پارلامەنتۆیا ئیراقێ دا راپۆرت ئامادە کرن و کۆمیتە ئانین لێ ھەتا نھا تشتەک ژ بۆ قەرەبووکرنا ڤان کەسان نەھاتیە کرن و دەستنیشان کر، ئەڤە ژی تێ وێ واتەیێ کو بەغدا ل بەندێیە کو گەل جارەکا دن بهێتە کۆچبەرکرن.
فەھیم عەبدولا ھەر وھا شەرێ پەکەکێ و ترکیێ وەک “شانۆگەریێ” ب ناڤ دکەت و ئانی زمان، “ھەگەر چارەیەک ژ بۆی ڤێ شانۆگەریێ نەیێ دیتن دێ شەر د ناڤ سینۆرێ پارێزگەھا دوھۆکێ ب تەنێ دا نەمینیت و دێ بەشەکێ مەزنێ ھەرێما کوردستانێ بیتە قوربانیا ڤێ شەرێ بێ ئەنجام، ژ بەر کو نە پەکەکە دزانیت چ دخوازیت و نە ژی ئارمانجا دەستھلاتدارێن ترکیێ دییارە.”
فەھیم عەبدولا دیار کر کو پەکەکە رێ ژ بۆ ئارتێشا ترکیێ ڤەدکەت کو بهێتە ناڤ ھەرێما کوردستانێ و گۆت، “ھەر شوونا کو پەکەکە خالێن سەربازی داتینە، ئەو دەر دکەڤیتە دەستێ ئارتێشا ترکیێ. بەرێ ژی پەکەکێ رێ نەدا کو پێشمەرگە ل جھێن ستراتەژیکێن دەڤەرێن سینۆری یێن ناڤبەرا دوھۆکێ و باکورێ کوردستانێ دا ب جھ ببن و پشتی بریارا سەرۆک بارزانی یا بۆ قەدەغەکرنا شەرێ براکوژیێ، پەکەکێ ئەو بریار ب دەست ڤە ئانی و ژ ھەر دەمەکێ زێدەتر ئێرشی سەر دەڤەرێن ئاڤەدان کر و رێ ل بەر پێشمەرگەیان گرت.”
