ئەنجوومەنا نشتیمانی یا کوردی ل سووریێ ئه‌نه‌كه‌سه، داخوازێ ژ ئه‌مه‌ریكایێ دکەت، سینۆرەکی ژ بۆ بنپێکرنێن په‌یه‌دێ ل رۆژئاڤایێ کوردستانێ دانیت.
د چەند رۆژێن بۆری دا 9 ئۆفیسێن ئه‌نه‌كه‌سێ و پارتیێن د ناڤا وێ دا هاتبوون شەوتاندن، د وێ دەربارێ دا سکرتارییا گشتی یا ئه‌نه‌كه‌سێ ئیرۆ د داخویانیەکێ دا راگهاند، «په‌یه‌ده و دەزگەهێن وێ یێن ئەولەکاریێ، ب رێیا ئێریشکرنا ل سەر ئه‌نه‌كه‌سێ و شەوتاندنا ئۆفیسێن وێ، سڤکاتیکرنا ب ئالا و سەمبۆلێن کوردستانێ، برێکخستنا مەشێن د بن سەمبۆل و دروشمێن په‌كه‌كێ دا، رەڤاندنا زارۆکان و گەفخوارنا ل مالباتێن پێشمەرگەیێن رۆژ، گرژی و ترساندنێ د ناڤا خەلکی دا زێدە دکەت».
ئه‌نه‌كه‌سه دیار کر کو ئارمانجا په‌یه‌دێ ژ ڤان ئێریشان ئەوە «کەدێن كو ئه‌مه‌ریكا ژ بۆ ئامادەکرنا زەمینەکا ئەرێنی ژ بۆ نەهشتنا ئاستەنگیێن ل پێش دانوستاندنێن کوردی ددەت، تێک بدەت، هەروه‌ها ژ بۆ بداویکرنا ژیانا سیاسی و ڤەشارتنا تێکچوونێن وێ یە».
ئه‌نه‌كه‌سه د ڤێ دەربارێ دا دبێژیت: «ئەم بانگ ل هەڤپەیمانیا ناڤدەولەتی و ب تایبەت ئه‌مه‌ریكایێ دکن ژ بەر كو ل هەرێمێ یە و پێوەندیێن وێ ل گه‌ل هه‌سه‌دێ هەنە و سەرپەرشتییا دانوستاندنێن کوردی دکەت، رێکارێن پێویست بگریته به‌ر و هەلوەستەکێ جدی ل هەمبەر کەسێن ل پشت ڤان ئێریشان نیشان بده‌ت و وان جەزا بکەت».
