رێخستنا په‌كه‌كێ، ژ بۆی تێكبرنا ره‌وشا باشوورێ كوردستانێ د ناڤ هه‌ولێن مه‌زن ده یه، هه‌ر رۆژ پیلانان چێدكه و هه‌ر كو دچه خه‌ته‌رییا وێ ل سه‌ر ڤێ په‌رچه‌یا وه‌لات بهێتر دبه.
ئه‌نجوومه‌نا ئاساییشا هه‌رێما كوردستانێ، دوهـ رۆژا سێشه‌می 26/4/2022ێ ژناڤبرنا پیلانه‌كه خه‌ته‌ر ئا رێخستنا په‌كه‌كێ ل دژی هه‌رێما كوردستانێ راگهاند، ئه‌نجوومه‌نا ئاساییشێ ده‌ست ب سه‌ر قه‌باره‌یه‌كی مه‌زن یێ ته‌قه‌مه‌نی و كه‌لوپه‌لێن له‌شكری ده ژی گرتییه كو په‌كه‌كێ دخوه‌ست ل هه‌رێما كوردستانێ ب كار بینه.
رۆژا 17 ڤێ مه‌هێ، به‌رپرسێ یه‌په‌گێ یێ ب ناڤێ «رۆدی حسێن» دخوه‌ست تۆنه‌كا TNT، 23 ماتۆرێن درۆنان، 1200 ماسكه‌یێن دژه گاز و 375 چه‌كێن كلاشینكۆف ژ رۆژئاڤا ده‌رباسی باشوورێ كوردستانێ بكه، ئه‌ڤ چه‌ك د ناڤا باره‌كی ده هاتبوو ڤه‌شارتن، لێ به‌لێ هێزێن ئاساییشێ ل سینۆرێ دهۆكێ، ئه‌و گرتن.
ل گۆری داخویانییا ئه‌نجوومه‌نا ئاساییشا هه‌رێما كوردستانێ، یه‌په‌گێ كه‌سی ب ناڤێ «یوونس ئه‌حمه‌د قاسم» كو نیشته‌جیهه‌كێ كامپا «دۆمیز» یا په‌نابه‌رێن رۆژئاڤایه ئه‌ركدار كربوو كو ئه‌ڤان چه‌ك و ته‌قه‌مه‌نییان بگهینیت په‌كه‌كێ، ژ بۆ كو ل ناڤ هه‌رێما كوردستانێ چالاكی پێ وه‌رن ئه‌نجام دایین.
پێگه‌ها «داركا مازی» ژ ئادارا ئیسالێ ڤه د هه‌ژماره‌كه نووچه و مژارێن خوه ده هشیاری ژ ڤان كریارێن ته‌رۆریستی یێن رێخستنا په‌كه‌كێ دا بوو و ئه‌شكه‌ره كربوو كو په‌كه‌كه وێ ل مه‌هێن پێش مه كریارێن ته‌رۆریستی ل هوندرێ باژێرێن كوردستانێ پێكبینه، ژناڤبرنا ئه‌نجوومه‌نا ئاساییشێ ژ بۆی یێك ژ هه‌ولێن رێخستنا په‌كه‌كێ كو دوهـ ئیلان كرییه، به‌لگه‌یه ل سه‌ر راستییا راپۆرێن پێگه‌ها «داركا مازی».
پێگه‌ها «داركا مازی» ل 4 نیسانا ئیسال 2022ێ مژاره‌ك ده‌ربارێ «پێنگاڤێن ئاژاوەگێری یێن پێشبینی كری یێن پەکەکێ ل هه‌رێما كوردستانێ» پارڤه‌كربوو و تێده ب وورده‌كاری ڤه باس كربوو كو په‌كه‌كه دخوازه ل رۆژێن پێش مه چ كریاران ل باشوورێ كوردستانێ ئه‌نجام بده.
حكوومه‌تا هه‌رێما كوردسانێ خوارن، ده‌رمان و ئالیكارییان ژ بۆ رۆژئاڤا كوردستانێ دشینه، یه‌په‌گه ژی TNT و مووشه‌كان ژ بۆی وێرانكرنا كوردستانێ نه‌ك ئارتێشا ترك دشینه باشوور، ئه‌نجوومه‌نا ئاساییشێ ته‌ڤی كو دوهـ ژناڤبرنا پیلانه‌كا په‌كه‌كێ ژ بۆی تیكدانا باشوورێ كوردستانێ راگهاند، لێ به‌لێ پیلانێن خه‌ته‌ر یێن په‌كه‌كێ ب داوی نابن و لڤ و ته‌ڤگه‌را رێخستنێ یا تێكدانا باشوور وێ بدۆمه.
