چەکدارێن پککێ ل رۆژاڤایێ کوردستانێ ئەڤ دو زارۆکە ژی رەڤاندن

 مالباتەک ژ کۆبانی و یەک ژی ژ قامشلۆ دبێژن کو زارۆکێن وان ژ ئالیێ جوانێن شۆرەشگەر ڤە ژ بۆ لەشکەریێ ھاتینە برن.

شاکر محەمەد ھبۆ، زارۆکەکێ 14 سالییە و مالباتا وی دبێژیت، کورێ وان شاکر رۆژا 28ێ شوباتا ئیسال، ژ جادەیا «موونیر حەبیب» یا قامشلۆ ژ ئالیێ “جوانێن شۆرەشگەر’ ڤە ژ بۆ لەشکەریێ ھاتیە برن و ھەتا نھا چارەنڤیسا وی نە دیارە.

مالباتا «شاکر محەمەد ھبۆ» دبێژیت، ئەو چوونە «مەدینە ئەل-شەباب» کو بارەگەھا جوانێن شۆرەشگەر ل وێ دەرێ یە لێ وان  گۆتە مە کورێ وە نە ل جەم مەیە.

بابێ شاکر دبێژیت، ژ 1ێ ئادارا 2022یێ ڤە وان ناڤێ کورێ خوە ل ئۆفیسا پاراستنا زارۆکان تۆمار کریە، لێ ھێژ تشتەک ژ بۆ وان نەکرنە و گۆتیە وان کو ئەو نکارن تشتەکی بکەن.

ھەر وھا ل کۆبانی ژی مالبەتەکا کورد دبێژیت، کورێ وان یێ ب ناڤێ «فەھەد عەبدولرەحمان» ئەڤە نێزیکی 8 مەھانن ژ ناڤچەیا پیشەسازییا کۆبانی ژ ئالیێ جوانێن شۆرەشگەر ڤە ژ بۆ لەشکەریێ ھاتیە برن و ھەتا نھا ئەو تشتەکێ ل سەر وی نزانن.

مالباتا فەھەد دبێژیت، ژ بۆ زانینا تشتەکێ ل سەر کورێ خوەیێ 15 سالی، وان سەرەدانا سازیێن جودا یێن رێڤەبەریا خوەسەر کرنە، لێ بێ سوود بوویە و ھەتا نھا نزانن کا کورێ وان ل کو دەرێ یە و چ ھاتیە سەرێ وی.