داگیرکرنا باشوور و حەسابێن 2023یێ!
ئەڤە چەند رۆژن دەولەتا ترک دیسا پەکەکە کریە بەهانە و ئێریشی خاکا باشوورێ کوردستانێ دکەت و گاڤ ب گاڤ نێزیکی دوھۆکێ دبیت. ژ بەر کو پەکەکە وەک رێخستنەک تەرۆریست ھاتیە پەژراندن، دەولەتا ترک مافێ خوەیێ یاسایا ناڤنەتەوی ب کار تینیت و ژ بەر ڤێ یەکێ ژی هیچ کەسەک دەی ناکەتێ. ھەبوونا پەکەکا ل باشوور و رۆژئاڤا ماف، مەفەر و فەرسەندێ ددەتە دەولەتا ترک کو ئێریشی باشوور و رۆژئاڤا بکەت، خاکێ داگیر بکەت، تێ دا ئاسێ بمینیت و خوە ژ واندەران دەرنەکەڤیت. ئارمانجا “میساقا مللی” و بەرفرەھکرنا خاکا عۆسمانی ژ خوە ھەم ئارمانجا دەولەتا ترکە، ھەم ژی ئارمانجا پەکەکێ ب خوەیە.
وەکو دهێتە زانین، حوکمێ پەیمانا لۆزانێ د 2023یێ دا خەلاس دبیت. حوکمێن کو کوردستان 100 سالن پارچە کربوون ژ ھۆلێ رادبن. پشتی رابوونا ھوکمێن پەیمانا لۆزانێ، دێ ل رۆژھلاتا ناڤین دا و ب تایبەت ژی ل سەر خاکا کوردستانێ پەیمان و حوکمێن نوو هێنە سازکرن و ھەول دهێتە دان کو رۆژھلاتا ناڤین ب نەخشەیەک نوو بهێتە خەملاندن کو کوردستان ژی د ناڤ وێ نەخشەیێ دا ھەبیت. ھەلبەت ئەڤ یەک گرێدایی یەکیتییا کوردان و گرێدایی داخوازێن کوردایە. ھەگەر کورد ھشمەند بن و بەرژەوەندییێن خوەیێن حیزبی نەکەنە ئاستەنگ، ھەگەر ل سەر ھندەک خالێن بنگەھین رێکەفتنا خوە چێکن و د داخوازێن خوە دا زەلال بن، دێ ب ئالیکارییا ھێزێن ھەڤپەیمان و دەولەتێن وەک ئامەریکا و فرانسایێ کاربن تشتەکێ بدەستخن. نا ھەگەر دیسا بەرژەوەندییێن خوەیێن حیزبی ل پێشییا بەرژەوەندییێن کوردستانێ بکەنە ئاستەنگ، دێ دەولەتێن مەزن ژی ل گۆر وێ یەکێ حەسابا خوە کن، دێ ھێڤییێن خوە ژ کوردان و کوردستانێ قوت کەن و ل دووڤ بەرژەوەندییێن خوە کەڤن.
سەدەمەک ژ سەدەمێن ھەری مەزن یێن ئێریشێن دەولەتا ترک ئەڤ یەکەیە، ئەڤ ترسەیە. ئانکو، ترسا رابوونا حوکمێن پەیمانا لۆزانێ و 2023یێ یە. دەولەتا ترک و حکوومەتا وێ ژ زوو دا حەسابا خوە و ئامادەکارییێن خوە ژ بۆ 2023یێ دکەت. نە تەنێ ئەو، پەکەکە ژی ژ رۆژا رۆژ دا ژ بۆ 2023یێ ل باشوور و رۆژئاڤا ھاتیە بجیھ کرن و خزمەتا ھەمان ئارمانج و ترسێ دکە. سەدەما کو پەکەکە پارادیگمایا ئانتی “نەتەو-دەولەتبوونێ”، ئەم “کورد دەولەتێ ناخوازین”، “براتی و ھەڤژیانا گەلان و کۆمارا دەمۆکراتیک دخوازین” دا پێش 2023یێ رابوونا حوکمێن پەیمانا لۆزانێ یە. د ڤر دا پەکەکە و دەولەت ژ بۆ یەک ئارمانجێ تێدکۆشن و ئەو ژی ئەڤە کو کورد نکاربن پشتی 2023یێ ببنە خوەدییێ ستاتویەک نەتەوی. سەدەما کو پەکەکە ناھێلیت پەیەدە و ئەنەکەسە ل ھەڤ بێن و رێکەفتنەک نەتەوی چێکن ژی دیسا ئەڤەیە.
بێگومان، دەولەتێن وەک ئامەریکا و فرانسا ژی حەسابێن پشتی 2023یێ دکن و دخوازن رۆژھلاتا ناڤین ل گۆر بەرژەوەندییێن خوە بنەخشینن. ژ بەر کو د رۆژھلاتا ناڤین دا تەنێ کوردان نێزیکی خوە و وەک دۆستێن خوە دبینن، حەسابا خوە ل سەر وان دکن و دخوازن وان نێزیکی ھەڤ بکن، رێکەفتنەکێ د ناڤبەرا وان دا چێکن. سەدەما کو ماکرۆن سەرۆکێ کوردستانێ نێچیرڤان بارزانی ڤەخواندی پاریسێ ژی ئەڤ یەکەبوو. ئامەریکا و فرانسا دخوازن ب ناڤگینی و قاسدییا نێچیرڤان بارزانی رێکەفتنا پەیەدێ و ئەنەکەسێ چێکن دا کو کاربن پشتی 2023یێ ستاتویەکێ ژ بۆ کوردان دامەزرینن و ھەتتا باشوور و رۆژئاڤا بکن یەک. ھەلبەت دەولەتا ترک ڤێ یەکێ دبینیت و دزانیت. ژ بەر ڤێ، پشتی چوونا نێچیرڤان بارزانی گرانییا خوە زێدەتر دا ئێریشێن سەر باشوور دا کو بەری تێکچوونا پەیمانا لۆزانێ بەشەک ژ خاکا باشوور و رۆژئاڤا داگیر بکەت و خەونا خوەیا میساقا میللی پێک بینیت. دەولەتا ترک ب سەر دکەڤیت یان نە تشتەکێ دنە. لێ دێ خاکا کو داگیر کریە ل دژی ئامەریکا و فرانسایێ ژ بۆ خوە وەک کارتا فەشارێ ب کار ئینیت و ھەول دەت لگەل وان دا ببیتە شریک.
گەلەک ژ مە حکوومەتا باشوور رەخنە دکن و دبێژن “چما دەنگێ خوە ل دژی دەولەتا ترک ناکن”. بێگومان، هەر کەسێ نە ل شەری بیت شێرە و کەس ب خوێیا گرارا کەسی نزانیت. ھەر چقاسی حکوومەتا باشوور د بریارێن ناڤخوەیی دا سەربخوە بیت ژی، د سیاسەتا دەرڤە دا گرێدایی حکوومەتا بەغدایێ یە و مافێ وێ یێ بریاردایینا د سیاسەتا دەرڤە نینە. د بریارێن ناڤخوەیی دا ئازادە، لێ د بریارێن دەرڤەیی دا ھێسیرێ بەغدایێ یە. ئەڤ یەک حکوومەتا کوردستانێ کەڕ و لال و کۆر دکت و دەست و لنگێن وێ گرێ ددت. ل دژدەرکەتنا ئێریشێن دەولەتا ترک مافێ بەغدایێیە و بەغدا ژی ل گۆر یاسایێن ناڤنەتەوی ڤی مافی ژ بۆ دەولەتا ترک رەوا دبینیت.
ب کورت و کورمانجی؛ دەولەتا ترک و پەکەکە شەرەکێ ب شێور و مشێور دکن. ئێریشێن دەولەتا ترک و داگیرکرنا بەشەک ژ خاکا باشوور و رۆژئاڤا، پارچەیەک ژ حەسابا 2023یێ، تێکچوونا پەیمانا لۆزانێ و خەونا بەرفرەھکرنا “میساقا مللی” یە. ھەگەر ئامەریکا و فرانسا رێ ل بەر دەک و دۆلابێن پەکەکێ نەگرن و پەیەدە و ئەنەکەسێ ل ھەڤ نەینن، نە ل رۆژئاڤا ستاتویەک نەتەوی چێدبیت، نە باشوور و رۆژئاڤا دبن یەک، و نە ژی د نەخشەیا پشتی 2023یێ دا جھێ خوە دگرن. تفاق و یەکیتییا کوردان ھەم ل خێرا کوردانە، ھەم ل خێرا دەولەتێن رۆژئاڤا. پارچەبوون و بێتفاقی دێ مرنا کوردان و داگیرکرنا کوردستانێ بەردەوام بکە و وێ ببە سەدەما لۆزانێن نوو.
