وەزارەتا به‌رگریێ یا ترکیێ راگهاند، کو ل پارێزگەها شرنەخێ یا باکور کوردستانێ لەشکەرەکی وان د ئۆپەراسیۆنێ دا ل چیایێ جودی ژ زنارێ کەتییە و مرییە.
ئارتێشا ترکیێ رۆژا 24ێ نیسانا 2022ێ ل چیایێن جودی و گابارێ یێن باکورێ کوردستانێ ئۆپەراسیۆنا خوە یا ب ناڤێ «ئەرەن دۆرپێچ-5» دابوو دەستپێکرن.
د دەمەکی دا کو ئەو ئۆپەراسیۆن بەردەوامە، وەزارەتا به‌رگریێ یا ترکیێ ئیرۆ 30ێ نیسانا 2022ێ ل سەر مالپەرا خوە یا فەرمی راگهاند کو سه‌بازه‌كێ وان یێ ب ناڤێ بەرکای ئاکگون ل دەڤەرا ئۆپەراسیۆنێ یا چیایێ جودی ژ زنارێ کەتیە و مریە.
ل گۆری ئه‌وا كو وەزارەتا به‌رگریێ تركیێ دبێژیت، لەشکەرێ ناڤبووری دەستپێکێ بریندار بوویە و ب هەلیکۆپتەرێ بۆ نەخوەشخانەیێ هاتییە ڤەگوهاستن، لێ ل نەخوەشخانەیێ مرییە.
