پایسلكسواره‌كێ دانیماركی، ئیرۆ رۆژا ئینی ده‌ما د خوا‌ستی ب پایسكلا خوه ژ كانی ماسێ ده‌رباس ببيت، مينه‌كا په‌كه‌كێ پێڤه ته‌قیا و ژیانا خوه ژ ده‌ست دا.
چاڤكانیێن پێگه‌ها داركا مازی ئه‌شكه‌ره كرن، هه‌ردو پایسكلسوارێن دانیماركی «یۆهانس ویلیام و توربجورن هوبدن» كو ئه‌ڤ ده‌ما چه‌ند رۆژان بوو ب پایسكلێن خوه د سه‌ر ده‌هان ولاتان را گه‌هشتبوون هه‌رێما كوردستانێ، یێك ژ وان ئیرۆ رۆژا ئینی 5/5/2022ێ ل سه‌ر رێیا نێڤبه‌را كانی ماسێ و ئامێدیێ ژ هێلا په‌كه‌كێ ڤه هات كوشتن.
چاڤكانیێن مه ده‌ستنیشان كرن، وه‌ختا هه‌ردو پایسكلسوار گه‌هشتینه رێیا نێڤبه‌را كانی ماسێ و ئامێدیێ ب تا‌یبه‌ت ناڤچه‌یا ب ناڤێ گانمێركێ و یا كو ب رێیا كه‌ڤن ژی دهێته ناس كرن، پایسكلسوارێ ب ناڤێ «یۆهانس» ژ پایسكلا خوه ژ بۆ ده‌ستئاڤێ دادكه‌ڤیت ئالیێ رێكێ و ژ نشكه‌كێ ڤه مینه‌كا رێخستنا په‌كه‌كێ پێڤه دته‌قیت و هه‌ر راست ژیانا خوه ژ ده‌ست دده‌ت.
چاڤكانیێن پێگه‌ها «داركا مازی» ئه‌شكه‌ره كرن، ئه‌ڤ هه‌ردو پایسكلسوارێن دانیماركی ب رییا GPS ل رێ دچوون و GPSی به‌رێ وان دابوو وێ رێیا كه‌ڤن یا ل نێڤبه‌را ئامێدی و كانی ماسێ.
رێخستنا په‌كه‌كێ ب سه‌دان مین و TNT ل سه‌ر رێیا وه‌لاتییان و پێشمه‌رگه‌هێن كوردستانێ ل ده‌ڤه‌را ئامێدیێ دانانه، داوی جار كو رۆژا یه‌كه‌م یا جه‌ژنا ره‌مه‌زانا پیرۆز بوو، هێزێن پێشمه‌رگه‌هان 200 كیلۆ TNT یا په‌كه‌كێ ل سه‌ر رێیا كانی ماسێ ژ ناڤ بر بوو.
