پرتووکا ب ناڤێ “پەکەکە چما وسا دکە” کو ژ ئالیێ شەهید «فەرەنسۆ حەریری» ل سالا 2000ێ ب سۆرانی هاتبوو نڤیساندن ژ ئالیێ «دلۆڤان عەلی» ڤە هات کورمانجیکرن.
ئەڤ پرتووکە وەکە رێزە گۆتار د رۆژنامەیا «براتی» دا پارڤە بوویە و پشترا وەکە پرتووک هاتیە ئامادەکرن و چاپکرن، ئەڤ پرتووکە وەکە بەرسڤەک ژ بۆی پرتووکا “دیرۆکەک ژ ئاگر” یا جەمیل بایک کو وەکە دیرۆکا پەکەکێ ل ئاکادمیا پەکەکێ دا دهێتە خوەندن، هاتیە نڤیساندن.
فەرەنسۆ حەریری د ناڤا پرتووکێ دا ئاماژە ب ڤێ یەکێ دکە کو د پرتووکا “دیرۆکەک ژ ئاگر” یا جەمیل بایک دا، د 79 رووپەلان دا ناڤێ پەدەکێ هاتییە و بایک پۆختان و بێ بەختی ل دژی پەدەکێ چێکرنە و بەرسەڤا ڤان دەرەو و بێبەختیان ددە، هەر وها د ڤێ پرتووکێ دا قالا هندەک بوویەرێن دیرۆکی یێن وەکە شەرێ پەکەکێ ل دژی پەدەکێ ل باشوورێ کوردستانێ و پەیمانێن د ناڤبەرا وان دا دکە.
پرتووکا “پەکەکە چما وسا دکە” وەکە ئانالیزەک پڕ باش تێ نرخاندن، د ڤێ پرتووکێ دا شەهید «فەرەنسۆ حەریری» پارگارافێن پرتووکا جەمیل بایک ددە با هەڤ و شیرۆڤە دکە، ب ئاوایەکی کو د یەک رووپەل دا د دو پاراگرافان دا بایک قالا پەدەکێ کریە، لێ د هەر پاراگرافەکێ دا ب رەنگەکێ باسی پەدەکێ هاتیە کرن و گۆتنێن وی پر ناکۆک و دژی هەڤن، «فەرەنسۆ حەریری» ب ڤێ یەکێ دخوازە ببێژیتە کوردان جەمیل بایک کوردان دخاپینیت، ژ بۆی ئیسپات کرنا ئاخافتنا خوە ژی گۆتنێن جەمیل بایک ددەتە با هەڤ و ناکۆکیێن د ئاخافتنا وی ب خوە دا ئەشکەرا دکە.
د پرتووکێ دا قالا جڤینا سالا 1995ێ، یا د نێڤبەرا پەدەکێ و پەکەکێ تێ کرن کا ب چ ئاوا دەما ئەڤ دو هێزە د جڤینێ دا بوون گەریلایێن پەکەکێ ئێریشی 26 بارەگەهێن پەدەکێ کرن و بوونە سەدەما دەرکەتنا شەر.
هەر وها د پرتووکێ دا قالا رێکەفتنا سالا 1983-1984ێ یا د نێڤبەرا پەدەکێ و پەکەکێ دهێتە کرن، فەرەنسۆ حەریری دبێژە، پەکەکێ ئەڤ رێکەفتن ب تەنێ وەکە تاکتیک ئیمزا کر و ب ڤێ رێکەفتنێ خوەستیە دەستهلاتا خوە ل باشوور جیبجی بکە و دەربە ل پەدەکێ بخە، فەرەنسۆ حەریری یەک ب یەک دەرەوێن بایک یێن کو د پرتووکا “دیرۆکەک ژ ئاگر” دا کرینە ئیفشا دکە و ژ بۆی ڤێ یەکێ ئاخافتنێن ناکۆک یێن بایک د پاراگرافێن جودا یێن ڤێ پرتووکێ دا کرین بەرچاڤ دکە.
ب ئاوایەکی گشتی د ڤێ پرتووکێ دا راستیا پەکەکێ و روویێ وێ یێ حەقیقی هاتیە ئەشکەرە کرن، د پرتووک دا باسی رەڤاندنا زارۆکان و کوشتنا سڤیلان و تەقاندنا چاڤکانیێن ئاڤێ ل باشوورێ کوردستانێ ژ ئالیێ پەکەکێ ڤە و تۆپبارانکرنا باشوور ب تۆپێن داگیرکەران یێن د دەستێ پەکەکێ دا هاتیە کرن، هەر وەها باسی ڤێ یەکێ ژی هاتیە کرن کا چەوا پەکەکێ تەڤ رێخستنێن کوردی یێن ل باکورێ کوردستانێ ژ هۆلێ راکرنە.
د ڤێ پرتووکێ دا ب ئاوایەک زەلال هاتیە دیارکرن کو دەما پەکەکە و پەدەکە د جڤینێ دا بوون، پەکەکێ ب رێیا هندەک رۆژنامەڤان و کادرۆیێن خوە تەڤ نهێنیێن د جڤینێ دا گهاندنە دەولەتا ترکیێ و ناڤەرۆکا جڤینێ ژ بۆی ترکیێ ئەشکەرە کرییە. فەرەنسۆ حەریری ب بەلگە و دیکۆمەنت ئەشکەرە دکە کا چەوا پەکەکە ژ ئالیێ سازیێن ئیستخبارتی یێن دەولەتێن داگیرکەر ل دژی ئەزموونا هەرێما کوردستانێ و دەستکەفتیێن وێ یێن نەتەوی دهێتە بکارئانین.
پێشگۆتنا پرتووکێ ژ ئالیێ نڤیسکار و رۆژنامەڤانێ کورد “محەمەد سانری” هاتیە نڤیساندن، دلۆڤان عەلی ئەڤ پرتووکە ژ سۆرانی وەرگەراندیە سەر زاراڤێ کورمانجی، ژ ئالیێ وەشانخانەیا دۆز هاتیە چاپکرن و بریارە د دو رۆژێن بهێت دا بکەڤیتە بەر دەستێ خوەندەڤانان.
