رۆژنامەڤان و نڤیسکارێ دیارێ رۆژئاڤایێ کوردستانێ، ژ بەر رەوشا نها یا ب سەرێ جوانێن کورد ئینای رەخنەیێن توند ل پەکەکێ دگریت و ئاشکەرا دکە کو دەستێن جەمیل بایک و موراد کارایلان د کوشتنا گەلەک جوانێن کورد دا ھەیە.
نڤیسکارێ رۆژئاڤایێ کوردستانێ ھۆشەنگ ئۆسێ کو ب خوە ژی دەمەکێ د ناڤ رێزێن پەکەکێ دا کار کریە، د کانالا خوەیا یۆتوبێ دا ڤیدیۆیەک بەلاڤ کر و بەحسا رەوشا شنگالێ کر و راگەھاند: “ئیران ناھێلە پەکەکە ژ شنگالێ دەرکەڤە، ھەرچەند نەفت ل شنگالێ نینە ژی لێ ژ بەر کو شنگال ژ بۆ رۆژئاڤایێ کوردستانێ و قەندیلێ و سلێمانیێ وەک دەریەکێ دەرباسبوونێیە و ژ بەر سەدەمێن لەشکەری پەکەکێ دەست ل سەر وێ ناڤچەیێ دا گرتیە.”
ھەروھا گۆت: “پەکەکێ ھەتا دکاری ژ بۆ بەرژەوەندیێن رەژیما سووریێ خەبات کر! مە نەدزانی پەکەکە رۆلا کرێگرتیێ ئانگۆ هەڤکاریێ ل گەل رەژیما سووریێ دگێریت. پەککە، پارتیا کارکەرێن کوردستانێ نینە. پارتیا کارکەرێن رەژیما ترک و رەژیما سووریێ و کۆمارا ئیسلامیا ئیرانێیە.”
ھۆشەنگ ئۆسێ پرس دکە کو ژ 2013ێ ڤە ھەتا ئیرۆ جەمیل بایک سەرۆکێ یەکەمێ پەکەکێ یە و د دەما موراد کارایلان دا ژی ئەو سەرۆکێ راستەقینێ پەکەکێ بوو و دبێژە وی چ ب سەرێ کوردستانێ ئانی؟
ھەروھا تەکەز دکە: “نھا دەما وێیە پەکەکە ل شنگالێ خوە ڤەکێشە، لێ ئەو ناڤەکێشن ھەتا کو بەرژەوەندیا ئیرانێ بخوازە. خوەزی پەکەکێ بەرژەوەندیا خوە ل بەرچاڤ گرتبا و ژ بۆ بەرژەوەندیا خوە ل شنگالێ مابا، لێ ئەو ژ بۆ بەرژەوەندیێن ئیرانێ کار و خەباتێ دکە.”
ھۆشەنگ ئۆسێ بەحسا ھندەک ئالیێن ڤەشارتی یێن گرتیگەھێن پەکەکێ ئاشکەرا دکە و دبێژە: “پەکەکە ل ھەر جیھەکی بە گرتیگەھا وێ ھەیە. د گرتیگەھێن وێ دا ب دەھان جوانێن کورد ھەنە، ب تایبەت ل ئەوروپا ژی گرتیگەھێن پەکەکێ یێن ڤەشارتی ھەنە.”
ھۆشەنگ ئۆسێ رەخنەیێن توند، ل موراد کارایلان و جەمیل بایک دگرە و ناڤەشێرە و دبێژە: “دەستێن وان د کوشتنا گەلەک جوانێن کورد دا ھەیە.” و راگەھاند: “گەلەک کەچ و کورێن کورد ل گرتیگەھێن پەکەکێ ھاتن کوشتن. پشترە گۆتن خوە کوشتنە، ب فەرمانا کارایلان گەلەک کەچ و کورێن کورد ھاتن کوشتن.”
