ل پارێزگەها دهۆکێ مینەک ب وەلاتیيەکی ده‌ تەقیا

ل ناحیا ئەترۆش یا سەر ب پارێزگەها دهۆکێ ڤە، ئیرۆ مینەک ب وەلاتییەکی ده‌ تەقیا و ب گرانی بریندار بوو.

پسمامەکی کەسێ بوویە قوربانیێ پەقینێ، ژ كوردستان 24 ره‌ راگهاند، ئیرۆ پسمامێ وی دەما دچوو ناڤا باخچەیێ خوە، مینەک پێ دە تەقیا و د ئەنجامێ دە بریندار بوو.

دیار کر ژی، پسمامێ وی 43 سالی یە و خێزاندارە و ژ بۆ وەرگرتنا چارەسەریێن بزیشکی ژ بۆ نەخوەشخانەیا هاوارهاتنێ یا دهۆکێ هاتە ڤەگوهاستن.

هەروها گۆت: تێ تەخمینکرن ئەو مین نوو هاتبە دانین، ژ بەر کو پسمامێ من پێشتر گەلەک جاران د وێ رێی ێ رە دچوو و دهات.

ژ هەیەما چەند سالان ڤە، تەڤگەرا چەکدارێن په‌كه‌كێ ل ناحیا ئەترۆش زێدە بوویە، ئەڤ یەک ژی بوویە جهێ دلگرانییا وەلاتیێن ناڤچەیێ.

ئەڤ یەک د دەمەکێ دە یە، پێر ل نێزیکی کانی ماسی مینەکە ڤەدایی یا په‌كه‌كێ ب دو سوارێن بسیکلێتێ یێن دانیمارکی دە تەقیابوو و یەکی ژ وان ژیانا خوە ژ دەست دابوو.

هەر وها رۆژا 2ێ گولانێ ژی، ل گوندێ چەقەلا یێ سەر ب ناحیا کانی ماسی ڤە، هێزێن ئەولەهیێ کارین نێزیکی 200 کیلۆگرام TNT یێن په‌كه‌كێ پووچ بکن.