سەرۆکوەزیرێ هەرێما کوردستانێ، مەسروور بارزانی ئیرۆ د کۆنفەرانسەکە رۆژنامەڤانی دە بەحسا رەوشا نها یا هەرێما کوردستانێ، پێوەندیێن ل گەل حکوومەتا فەدەرال، مافێن دەستووری یێن هەرێمێ و داوی گوهارتن و پێشهاتێن ئیراق و ناڤچەیێ کر.
سەرۆکوەزیر مەسروور بارزانی راگهاند، د هەیاما بۆری دا چەند مژار تێن بەحسکرن کو پێویستە ئەم رۆناهیێ بێخن سەر وان و هەول بدم بلەز بەحسا وان بکن و ئەگەر پێویست بکەت، ئەمێ ب فرەهی وان شرۆڤە بکن.
هلبژارتنا پارلامەنتۆیا کوردستانێ
ئەم وەک حکوومەتا هەرێمێ ب وێ یەکێ رە نە کو هلبژارتنا پارلامەنتۆیا کوردستانێ د دەما خوە دا بێن کرن و حکوومەتێ رێکار و تەدبیرێن پێویست ژ بۆ كو هلبژارتن د دەما خوە دا بێن کرن وەرگرتنە، ئەڤ ژی رێزگرتن ل پەرەنسیپێن دەمۆکراسیێ یە و هێڤیدارم هەموو ئالی ژی بکارن ل سەر ئەنجامدانا هلبژارتنێ ل هەڤ بکن.
ل پارێزگەهێن سلێمانی و هەلەبجە و ئیداره‌یێن سەربخوە راپەرین و گەرمیان مووچە د دەما خوە دە نایێ دایین
ژ دەستپێکا کابینەیا نەهەم ڤە مە گۆتیە کو ئەڤ حکوومەت، حكوومه‌تەکە سەرتاسەری یە و پێویستە ئەجێندایێن حكوومه‌تێ ل هەموو پارێزگەهـ و ئیدارەیێن سەربخوە بهێن جبجیکرن، ژ بەر ڤێ رەوانگەهێ ژی داخواز هاتە کرن کو دەستهلات ل سەر پارێزگەهـ و ئیدارەیان بهێته دابەشکرن تا کو بکارن کاروبارێن خوە برێڤە ببن و د بەر دا ژی بەرپرس بن.
مخابن وەک تێ خواستن، ئەجێندایا حكوومه‌تێ ل هەموو پارێزگەهان نەهات جبجیکرن و ل هن جهان داهاتا ناڤخوەیی زێدە بوون و ل هن جهان ژی کێم بوو.
سێ چاڤکانیێن داهاتا هەرێما کوردستانێ هەنە، یەک ژ وان پەترۆلە کو ل رێژەیا روونشتڤانان و میکانیزما کابینەیێن بەرێ هاتیە دەستنیشانکرن، داهات ب یەکسانی و دادپەروەرانە تێ دابەشکرن.
چاڤکانیا دویەم، داهاتا کو ژ حكوومه‌تا فەدەرال ڤە تێ شاندنە، ئەو ژی دەمەک درێژه نەهاتیە و هێژان دڤێ مەهانە داخوازا وێ بکن، تا ژ بۆ هەرێما کوردستانێ بێ تەرخانکرن.
داهاتا سێیەم ژی، داهاتا نەپەترۆلی یە، ئەڤ ژی ژ داهاتا خالێن سنۆری، رسوومان و باجێ و داهاتێن دن پێک تێ، ئەڤ داهات ل پارێزگەها دهۆکێ و هەولێرێ زێدە بوویە، لێ مخابن ل پارێزگەهێن دن وەک تێ خواستن کار ل سەر نەهاتیە کرن، ئەڤ ژی بوویە سەدەم کو مووچە ل وان جهان پاش بکەڤە، ئەڤ ژی جهێ پرسێ یە.
د رۆژێن بهێت دا دێ داخوازێ ژ بەرپرسێن پارێزگەهێن سلێمانی و هەلەبجە و ئیدارەیێن سەربخوەیێن راپەرین و گەرمیانێ دکم، بێن ژ من رە بەحسا پرسگرێکێن خوە بکن، دا کو دیار ببیت پرسگرێک ناڤچەیی نە یان گشتی نە و کی د بەر کێمبوونا داهاتی دا بەرپرسیارن.
