سێ پارتیێن کورد، پارتیا ئازادیا کوردستان (پاک)، پارتیا سۆسیالستا کوردستان (په‌سه‌كه) و تەڤگەرا دەمۆکراتێن کورد (ته‌ده‌كه) ب داخویانیەکا هەڤپار بال کشاندن سەر گرینگیا پاراستنا دەستکەفتیێن ل هەرێما کوردستانێ و بانگ و داخواز کرن کو هەموو ئالییێن کورد ژ بۆ پاراستنا وان دەستکەفتیان تەڤبگەرن، نە کو ببن سەدەما ژدەستدایینا وان دەستکەفتیان.
پاک، په‌سه‌كه و ته‌ده‌كێ ب داخویانیا هەڤپار بالێ دکشینن کو ئیران و ترکیە ئۆپەراسیۆن و ئێرشان دبن سەر خاکا هەرێما کوردستانێ و دخوازن بەر ل دەستکەفتیێن کوردان یێن ل هەرێما کوردستانێ تەنگ بکن کو ترکیێ بەشەک ژ ئاخا هەرێما کوردستانێ ژی ب چێکرنا قەرەقۆلان داگير کریە.
دیسا بال هات کشاندن کو تەڤگەر و پۆلیتیكایێن په‌كه‌كێ ل رۆژئاڤایێ کوردستانێ ژی رێ ل بەر وان ئێرشان و ژدەستدایینا دەسکەفتیێن کوردان خوەش دکە و دڤێ په‌كه‌كه دەست ژ وێ هەلوەستا خوە بەردە و هەماهەنگی ب پاراستنا دەستکەفتیێن کوردان بکە.
پارتیێن کورد بالێ دکشینن کو ترکیە، نەرازیبوونا خوە ژ دەستکەفتیێن، سیاسی یێن کوردان و بهێزبوونا ستاتویا کوردان ب ئەشکەرەیی دبێژە و ژ خوە رە دکە ئارمانج. ل گەل ڤە یەکێ ژی پۆلیتیكا، هەلوەست و تەڤگەرێن په‌كه‌كێ ژی رێ ل بەر وان ئارمانجێن ترکیێ و ئیرانێ خوەش دکە.
پارتیێن کوردیێن ل باکورێ کوردستانێ بانگ و داخواز دکن کو دڤێ شنگال وەک بەشەکە هەرێما کوردستانێ ب تایبەتمەندیێن خوە ئیدارەیا خوە یا هەرێمی بکە و په‌كه‌كه رێزێ ل رێڤەبریا هەرێما کوردستانێ بگرە و ژ تەڤگەر و پۆلیتیكایێن کو خزمەتا ئارمانجێن داگیرکەران دکە بدە راوەستاندن.
هەروها هاتیە راگهاندن کو «لگەل هەموو گۆتن و کریارێن نه‌رێنی یێن د دەربارێ مالباتا بارزانییان و په‌ده‌كێ دە، هەلوەستا برێز سەرۆک مەسعوود بارزانی یا کو رێ ل بەر شەرەکی د ناڤ کورد و کورد دە دگرە، ناهێلە کورد خوینا کوردان برژینە، هەلوەست و سییاسەتەکە جهێ رێزێیە. برێز سەرۆک مەسعوود بارزانی دڤێ د راگهاندنا خوە دە ژی نەهێلە کو کەس ب گۆتنێن نەخوەش زەرارێ بدە ڤێ حەساسیەت و هەلوەستا چێکەر یا جەنابێ وی».
بانگ ل په‌كه‌كێ، هه‌ده‌پێ، ده‌به‌پێ ده‌ته‌كێ و یێن پێوەندیدار ژی تێ کرن کو دەست ژ پۆلیتیكایێن رەشکرنا په‌ده‌كێ و ب خیانەتێ تاوانبارکرنێ، بەردن.
