ژوورا ئۆپەراسیۆنان یا وەزارەتا ناڤخوە یا ترکیێ راگهاند کو ئارتێشا ترکیێ ل پارێزگەها ئاگری یا باکورێ کوردستانێ، ب هنجەتا هەبوونا گەرلایێن پهكهكێ دەست ب ئۆپەراسیۆنەکا نوو یا ب ناڤێ ئەرەن دۆرپێچ-10 (ئەرەن ئابلوکا-10) کر.
ل گۆر داخویانیا وەزارەتا ناڤخوە یا ترکیێ، ژ دوهی سێشەمبێ 17ێ گولانا 2022ێ ئۆپەراسیۆنا ئەرەن دۆرپێچ-10 ب بەشداربوونا 915 سەربازان دەستپێ کرییە کو ژ 52 تیمێن ژ هێزێن جەندەرمە، جەردەڤان، گوندپارێز و تیمێن تایبەت پێک دهێن.
هەتا نها وەزارەتا ناڤخوە یا ترکیێ و ناڤەندا راگهاندنێ یا ههپهگێ چ داخویانیەک دەربارێ زیانێن گیانی و ئۆپەراسیۆنا نوو یا ناڤ باکورێ کوردستانێ دا بەلاڤ نەکرینە.
پشتی بداویبوونا ئۆپەراسیۆنێن زڤستانێ یێن ب ناڤێ زنجیرە ئۆپەراسیۆنێن «ئەرەن» کو هەتا ئەرەن-34 بەردەوام بوون، ڤێ جارێ وەزارەتا ناڤخوە یا ترکیێ زنجیرە ئۆپەراسیۆنێن بهار و هاڤینێ یێن ب ناڤێ ئەرەن دۆرپێچ ل دژی پهكهكێ دانە دەستپێکرن.
رۆژا 17ێ نیسانا 2022ێ قۆناغا یەکەما ئۆپەراسیۆنێن بهار و هاڤینێ ب ناڤێ دۆرپێچ-1 ل ئامەدا باکورێ کوردستانێ هاتبوو دەستپێکرن.