ل جۆلەمێرگێ قەدەغە بۆ 15 رۆژێن دن هات درێژکرن

hakkari-qedexe

ل پارێزگەها جۆلەمێرگێ یا باکورێ کوردستانێ، قەدەغەیا هەموو چالاکیێن وەک خوەپێشاندان، جڤینێن چاپەمەنیێ، گرەڤ و ڤەگرتنا کۆنان بۆ دەما 15 رۆژێن دن هات درێژکرن.

ل باژارێن باکورێ کوردستانێ ب هنجەتێن جودا قەدەغە ب داوی نابن. ل پارێزگەها جۆلەمێرگێ قەدەغەیا خوەپێشاندان و چالاکیان بۆ دەما 15 رۆژێن دن هات درێژکرن. ژ 19ێ گولانێ هەتا 2ێ هەزیرانێ بۆ دەما 15 رۆژان هەموو چالاکیێن وەک خوەپێشاندان، مەش، ڤەدانا چادر و داخویانیێن چاپەمەنیێ هاتن قەدەغەکرن.

ل گۆری داخویانیا کو ژ ئالیێ پارێزگه‌ها جۆلەمێرگێ ڤە هاتیە بەلاڤکرن، ژ 19 گولانێ هەتا 2ێ هەزیرانا ئیسال، بۆ دەما 15 رۆژان هەموو جۆرێن خوەپێشاندان، مەش، گرەڤێن برچیبوونێ، ڤەدانا چادر و ستاندان و چالاکیێن وها قەدەغەنە.

د داخویانیێ دە هات گۆتن کو ب ئارمانجا پرەنسیپێن سەرەکی یێن کۆمارێ، یەکپارچەییا دەولەت و نەتەوە، بنپێنەکرنا ماف و ئازادیێن کەسێن دن، ئاساییشا خەلکێ و ئانینا ئارامیێ، رێگرتن ل تاوان، پاراستنا ماف و ئازادیێن خەلکێ، رێگرتن ل زێدەتر بەلاڤنەبوونا كۆرۆنایێ بریارا قەدەغەکرنا خوەپێشاندان و چالاکیان هاتیە دایین.

ل گۆر داخویانیێ، بریارا قەدەغەکرنێ وان چالاکیێن فەرمی ل خوە ناگریت کو ژ ئالیێ پارێزگار و قەیمقامان ڤە دەستوور بۆ وان تێ دایین. قەدەغەیا چالاکیان یا ل جۆلەمێرگ و ناڤچەیێن وێ، ژ سالا 2016ێ و هەتا نها بەردەوامە.

پوستێن ھەمان بەش