کۆمیتەیا تێکلیێن دەرڤە یا كهجهكێ و سەرۆکێ تەڤگەرا «عهسائب ئەهل ئەل حەق» قەیس ئەل خهزعهلی، د هەمان رۆژێ دا گەف ل هەولێرێ کرن. تێ گۆتن کو نە تەسادوفە ڤان هەردو تەڤگەرێن توندرەو د یەک رۆژێ دا گەف ل حکوومەتا هەرێما کوردستانێ كرین، ئەڤ یەک هەڤرێزی و هەڤپشکییا د ناڤبەرا وان دا نیشان ددەت.
ژ کۆمیتەیا تێکلیێن دەرڤە یا كهجهكێ گەفا تێكدانێ
داخویانیا کۆمیتەیا تێکلیێن دەرڤە یا كهجهكێ د چاپەمەنیا گرێدایی پهكهكێ دا هات وەشاندن. د داخویانیێ دا هات ئیدیعا کرن کو ب هنجەتا بوویەرا «زەکی چەلەبی» یا ل سلێمانیێ چ تەدبیر نەهاتنە گرتن و ژ ڤان بوویەران هێزێن هەرێمی بەرپرسیارن. ل گەل کو د دەربارێ بوویەرێ دا هێژان چ بهلگه نینن و لێپرسین بهردهوامن ژی، لێ مەدیایا سەر ب پهكهكێ ڤە خواست پهدهكێ تۆمەتبار بکەت. ب راستی ژی ب بهلاڤكرنا وێنەیەکی کو نەدیارە ژ کو هاتیە کشاندن، راگههاندنا پهكهكێ گۆت کو کوژەرێن بوویەرێ رەڤیانە ههولێرێ. مەبەستا وان ب ڤێ نووچەیا دەرەو مانیپۆلەکرنا رایا گشتی بوو.
کۆمیتەیا تێکلیێن دەرڤە یا كهجهكێ ب ئاوایەک ڤەکری راگههاند کو ئەو دێ مافێ خوە یێ تۆلهلدانێ ب کار ئینن. د داخویانیا کۆمیتەیا تێکلیێن دەرڤە یا كهجهكێ دا هات گۆتن، “مافێ هەر کەسی هەیە کو ئەولەکاریا خوە بپارێزیت و تۆلا خوە ڤهكهت”. پشتی ڤێ هەڤۆکا ئیستفزازی د بەردەوامیێ دا هات گۆتن کو “دڤێت بهێته زانین ئەم ژ ئەنجامێن بوویەرێن كو دبیت رووبدهن، نهبهرپرسیارین”.
پلانێن گەمار یێ ل سەر هەولێرێ دهێنه کرن
کۆمیتەیا تێکلیێن دەرڤە یا كهجهكێ کو ب داخویانیێن خوە یێن ئیستفزازی گەلەک جاران دهێته رۆژەڤێ، کۆمیتەیەکه ل ناڤەندا باژارێ سلێمانیێ. ب تایبەتی ژی ل گهل ئیستخباراتا یهنهكێ و لاهور جەنگی تێکلیێن وان یێن نێزیک هەنە. ژ بۆ کو ئەڤ شەبەکەیا پەیوەندیان بهێزتر ببیت، گەلەک جاران ناکۆکیێن د ناڤبەرا هەولێر سلێمانیێ دا گوڕ دکەت و دبێژیت ئەم ئالیگرێ سلێمانیێ نە.
کۆمیتەیا تێکلیێن دەرڤە یا كهجهكێ د داخویانیا خوە یا داویێ دا ئیفادەیێن وەکی «سلێمانی ناڤەندا رۆناکبیریا کوردان» ب کار ئینا، ههولێر ژی وەکە «ناڤەندا قاتلان» دەستنیشان کر.
کۆمیتەیا تێکلیێن دەرڤە یا كهجهكێ د داخویانیێ دا ل شوونا حکوومەتا هەرێما کوردستانێ گۆتنا حکوومەتا باشوورێ کوردستانێ ب کار ئینا.
بەرێ كاڤهدانان د دهنن ههولێرێ
هەر چەنده دەربارێ کوژەرێن «زەکی چەلەبی» چ ئاگاهییێن راست ئانكو کێ ئەو کوشت، بۆچی کوشت، کوژەر چوویە کودەرێ نەهاتبنە دیاركرن ژی، لێ مەدیایا پهكهكێ وێنەیەک بهلاڤ كر و ب رێیا گۆتنا «کوژەر رەڤیانە هەولێرێ» ژی خواست هەم لێپرسینێ، هەم بەرێ گرسەیێ و هەم ژی بهرێ مالباتا «زەکی چەلەبی» بدهنه ههولێرێ. هەر چەنده بوویەر ل سلێمانیێ ژی روو دا، لێ گەفا تۆلهلدانێ ل هەولێرێ كر و تیرێن خوە ل هەولێرێ زڤراندن. پهكهكه و دەولەتا ترک د گەلەک مژاران دا وەکوەلەدێ یهك ماکێ نە. کی دەرێ بوویەرەک روو بدەت دەولەتا ترک کوردان تۆمەتبار دکەت. هەمان تشت ل جەم پهكهكێ ژی هەیە کی دەرێ بوویەرەک بقەومیت پهكهكه دبێژیت پهدهكێ کر. ئەڤ یەک دەستنیشان دکەت کو پهكهكه و دهولهتا ترك براماکێن هەڤن.
داخویانیا ههموهخت یا قەیس ئەل خهزعهلی و كهجهكێ
د هەمان رۆژا کو كهجهكێ گەف ل هەولێرێ كرین، هێزەکا دن ژی گەف ل هەولێرێ كرن. ئهو ژی سەرۆکێ تەڤگەرا عهسائب ئەهل ئەل حەق قەیس ئەل خهزعهلی بوو.
نووچەیا کو قەیس ئەل خهزعهلی تێدا گەف ل ههولێرێ كرین ژ ئالیێ چاپەمەنیا پهكهكێ ڤە هات بهلاڤ كرن. خهزعهلی د بەرنامەیا عههد TV دا ئیدیعا کر کو مۆساد ل هەولێرێ یە. گەفێن ل سەر هەولێرا پایتەخت ل هەمان ناڤەندا «دژە-کورد» دهێن مەشاندن.
د نووچەی دا هات ئیدیعاکرن کو قەیس ئەل خهزعهلی گۆتیە: «هەولێر بوویە ناڤەندا هێزێن چەکدارێن نەقانوونی و ئەڤ هێز دێ نها دەست ب هێرشان كهن».
پهكهكه ل ئیراقێ ب هەڤالبەندیا گرووپەکێ لەشکەری و سیاسی یێ شیعه یێ گرێدایی ئیرانێ کو قەیس ئەل خهزعهلی د ناڤ دا یە، تەڤدگەریت. ئەڤ گرووپا شیعه ل کەرکووک و شەنگالێ هێزێن لەشکەری یێن هەڤبەش هەنە. پەیوەندیێن د ناڤبەرا پهكهكێ و پێکهاتەیا شیعه یا ئیراقێ دا کو ل سالا 2013ێ دا ل ئالیێ ئیرانێ دەست پێ کربوون، نها د ئاستا شریکاتیا ستراتەژیک دا بەردەوام دکەن. ئارمانجا ڤێ شریکاتیێ ژی ژ ناڤ برنا ستاتۆیا هەرێما کوردستانێ یه و هەرێما کوردستانێ بکەن بەشەک ژ سیاسەتا ئیرانێ.
ل سەر ڤێ هەڤپەیمانیا پهكهكێ و حهشدا شهعبی و هێرشێن حهشدێ ل سەر هەولێرێ، دهێته فێمکرن کو نە تەسادوفە گەفێن كهجهكێ و رێبەرێ شیعه خهزعهلی د هەمان رۆژێ دا هاتنه كرن. خویایە د رۆژێن پێش مه دا پهكهكه و گرووپێن شیعه دێ هێرشێن خوە یێن ل سەر هەولێرێ زێدەتر لێ كهن. حەشدا شەعبی ب مووشەکان، پهكهكه ژی ب رێیا كریارێن تهرۆریستی و تێكدانێ دێ ل هەولێرێ ئالۆزییان چێكهن و هەولێرێ بەر ب فهوزایێ ڤە بهن.