پارتیا ئازادیا کوردستانێ (پاک)، پارتیا سۆسیالیستا کوردستانێ (پەسەکە) و تەڤگەرا دەمۆکراتیکا کوردستانێ (تەدەکە- تەڤگەر) ئیرۆ دەربارێ گەفێن سەرۆکۆمارێ ترکیێ رەجەپ تەییب ئەردۆگان یا دەربارێ دەستپێکرنا ئۆپەراسیۆنێن نوو ل دژی باشوور و رۆژئاڤایێ کوردستانێ دا، داخویانیەک ھەڤبەش بەلاڤ کرن.
داخویانیا پاک، پەسەکە، تەدەکە-تەڤگەر:
سیاسەتا داگیرکەری و ئێریشێن دەولەتا ترک ل باشوورێ کوردستانێ و رۆژئاڤایێ کوردستانێ رۆژ ب رۆژ زێدەتر دبن.
فرۆکەیێن شەری یێن دەولەتا ترک ھەر رۆژ ئێریشی سەر گوند و باژارۆکێن کوردستانێ دکن. د ئەنجاما ڤان ئێریشان دا گوند خراپ و وێران دبن، زەڤی، زۆزان، باخ و باخچە و دارستان تێنە شەوتاندن و ب دەھان کوردێن سیڤیل شەھید و بریندار دبن.
ئارتێشا بەژایی یا دەولەتا ترک بارەگاھ و بنگەھێن خوەیێن لەشکەری د ھەردو بەشێن کوردستانێ دا، زێدەتر و بھێزتر دکە.
د وان رۆژێن داوی دا ژی دەولەتا ترک و حکوومەتا ئاک پارتییێ دخوازە ژ ئالۆزیا ل ناڤچەیێ و ژ شەرێ رووسیا و ئووکراینایێ ئیستیفادە بکە و بەرنامەیا خوەیا کرێت ب جیھ بکە.
سەرۆککۆمارێ ترکیایێ ب ئاوایەکێ ئەشکەرا و ل بەر چاڤێ جیھانێ راگھاند کو ژ بۆنا پاراستنا “ئەولەھییا ترکیەیێ” وێ ناڤچەیەکە ئەولە ل سەر “سنۆرێن خوە” ب کووراھییا 30 کیلۆمەتران ئاڤا بکن.
بێگومان دەولەتا ترک دخوازە کو ب بەهانەیا “پاراستنا ئەولەھیا نەتەوی یا ترکیایێ” بالا خەلکێ بکشینە ئالیەکێ دن و ھەروەھا دژمناھییا کوردان خورتتر بکە.
ئاشکەرایە کو ل سەر “سنۆرێن ترکییایێ” ئاڤاکرنا “ناڤچەیەک ئەولەهـ” دێ رەوشا رۆژھلاتا ناڤین ئالۆزتر کەت. ئەڤە، نیشانا دژمناھییا دەولەتا ترکیا یا ل دژی دەسکەڤتێن نەتەوەیی یێن ملەتێ کوردە.
ئەڤە، پەیامەکە ژ بۆ بیروورایا گشتی و ب تایبەتی ژ بۆ ناتۆیە کو دخوازە ببێژە ” ژ بۆنا کو ئەز ل پێشیا ئەندامبوونا سوێد و فینلاندییایێ نەبم ئاستەنگ، دڤێت ھون ژی ئالیکاریا من بکن و دەنگێ خوە ل ھەمبەرێ من دەرنەخن کو ئەز ژی بکاربم باشوور و رۆژئاڤایێ کوردستانێ داگیر بکم و رێ ل بەر ستاتویەکا سییاسی یا ملەتێ کورد بگرم”.
ئەم وەکە پاک، پەسەکە و تەدەکە-تەڤگەر بانگی ھەموو ھێز و رێخستنێن وەلاتپارێزیێن ھەر چار پەرچەیێن کوردستانێ و ب تایبەت بانگی پارلامەنتۆ، حکوومەت و سەرۆکاتیا ھەرێما کوردستانێ دکن کو ل دژی ڤێ پلانا داگیرکەریا دەولەتا ترک ب یەکدەنگی و یەکھەلوەستی تەڤبگەرن.
ئەم ژ پەیەنەکێ، ئەنەکەسێ و ھەموو ھێزێن سیاسی یێن کوردێن رۆژئاڤایێ کوردستانێ داخواز دکن کو ژ بۆ پێشیلێگرتنا ڤان ئێریش و پلانێن دەولەتا ترک، دڤێت ئەو د زووترین دەم دا، ل سەر بنگەھا “پەیمانا ھەولێر و دھۆکێ” یێکتیا خوە پێک بنن و پێشمەرگەیێن رۆژێ بێ قەید و شەرت بکاربن ڤەگەرن رۆژئاڤایێ کوردستانێ.
دڤێ پەکەکە دەملدەست دەست ژ ڤێ سییاسەت، چالاکی و کریارێن خوە یێن کو ل باشوور و رۆژئاڤایێ کوردستانێ دمەشینە و رێ ل بەر ئێریش و سییاسەتا داگیرکەرییا دەولەتا ترک خوەشتر دکە بەردە.
ئەم ژ ھێزێن دەمۆکرات و ئاشتیخوازیێن ترکیەیێ داخواز دکین کو ل دژی ڤان پلانێن کرێت دەرکەڤن و پشتگرییا خەباتا ئازادیخوازییا گەلێ کورد بکن.
ئەم ژ بیروورایا گشتی یا جیھانێ، ژ دەولەتێن مەزن یێن رۆژئاڤا و ناتۆیێ داخواز دکن کو سەرێن خوە ل ھەمبەری ڤان داخوازێن دەولەتاترک نەچەمینن؛ نەبن شریکێن ڤان کریارێن قرێژ یێن ل سەر خوینا کوردان تێنە بازارکرن و پشتگرییا دۆزا ملەتێ کورد یا نەتەوەیی و دەمۆکراتیک بکن.
ئەم بانگی دەولەتا ترک ژی دکن کو دەست ژ ڤێ سییاستا خوە یا ئێریشکەر و داگیرکەرییا ل سەر دژایەتییا کوردان ھاتییە ئاڤاکرن بەردە؛ ل ھەر پەرچەیەکا کوردستانێ رێزێ ل ئیرادەیا ملەتێ کورد بگرە. ھەموو پرس و پرسگرێکێن ملەتێ کورد و کوردستانییان دڤێت ب رێیێن دییالۆگێ بێنە چارەسەر کرن.
25ێ گولانا 2022یێ
