رێخستنا په‌كه‌كێ، ئیرۆ ئێخستنا بالافره‌كا دن یا ئارتێشا تركیێ ل هه‌رێما كوردستانێ راگهاند، ب ڤێ یه‌كێ ئه‌ڤ دبه بالافرا 19ێ كو ب عه‌ینی رێكێ ب «فۆتۆشۆپێ» ژ هێلا په‌كه‌كێ ڤه ژ 17 نیسانێ ڤه تێ ئێخستن.
مه‌دیایا په‌كه‌كێ، ئیرۆ رۆژا پێنجشه‌مبی 2\6\2022ێ، ئێخستنا هه‌لیكۆپته‌ره‌كا دن یا ئارتێشا تركیێ ل چیایێ مه‌تینا یێ هه‌رێما كوردستانێ راگهاند و گۆتییه كو هه‌په‌گه باسكێ له‌شكه‌ری یێ رێخستنێ دێ داخویانییه‌كێ ده‌ربارێ ڤێ چالاكیێ پارڤه بكه.
ل گۆری ئاگاهیێن كو مه‌دیایا فه‌رمی یا په‌كه‌كێ پارڤه‌كرنه، ژ 17 نیسانێ و ده‌ستپێكرنا ئێریشا ده‌وله‌تا داگیركه‌ر یا ب ناڤێ «په‌نجه – كلیل»، رێخستنا په‌كه‌كێ هه‌ری كێم 19 بالافرێن هه‌لیكۆپته‌ر ئێخستنه و ده‌رب دانه!.
رێخستنا په‌كه‌كێ ته‌ڤی كو هه‌ر دو رۆژان جاره‌كێ دبێژه مه ئه‌وقاس عه‌سكه‌ر كوشتنه و ئه‌و قاس هه‌لیكۆپته‌ر ده‌رب دانه و ئێخستنه، لێ به‌لێ هه‌یا نها دیمه‌نێن ئێخستنا یه‌ك ژ وان ژی پارڤه‌نه‌كرییه، به‌لكو عه‌ینی وێنه كو ب «فۆتۆشۆپێ» هاتییه چێكرن ژ بۆی هه‌موو وان هه‌لیكۆپته‌ران ب كارئانییه یێن كو ئه‌و ئیدیعا دكه كو ژ 17 نیسانێ ڤه ئێخستنه.
چاڤكانیێن ل هه‌رێمێن گه‌ریلایان ژی ل باشوورێ كوردستانێ ئه‌شكه‌ره كرنه كو ژ 17 نیسانێ ڤه وان شۆپ و دۆكه‌لا كه‌تنا چ هه‌لیكۆپته‌ران ل هه‌رێمێ نه‌دیتییه و ده‌ستنیشان كرن كو په‌كه‌كه ڤان ئاگاهییان وه‌كه ده‌ره‌وێن رۆژانه پارڤه‌دكه.
