ل دەڤەرا شنگالێ نێزیکی 60 ھەزار چەکدارێن گرووپێن میلیشیا ھەنە، لێ بەلێ رەوشا شنگالێ ھەر وەکە خوەیە و خەلکێ وێ ئاوارە نە.
حەفت سالن چەند ھێز و گرووپ ل شنگالێ ھەنە، ھەموو لگەل ھێزێن خوەیێن چەکدار ل دژی ھەڤ د ئامادەباشیێ دا نە. شنگال ب خوە بریندارە، رۆژ ل پەی رۆژ ھەژمارا ھێزێن وان ژی د زێدەبوونێ دایە.
ل شنگالێ فرقەیەک و شەش لیوایێن ئارتێشا ئیراقێ ھەنە، ب گشتی نێزیکی 20 ھەزار لەشکەرن، ل باکور و باشوورێ چیایێ شنگالێ و ل سەر سینۆرێ ناڤبەرا ئیراق و سووریێ ھاتنە بجھکرن، ب دەھان بنکە و بارەگەھێن خوە داناینە.
پار 3 ھەزار پۆلیسێن فەدەرال گھیشتن شنگالێ و نھا ل ناڤەراستا شنگالێ و ناحیا سنوونێ و سینۆرێ ناڤبەرا ئیراق و رۆژئاڤایێ کوردستانێ ب دووریا 65 کیلۆمەترا ھاتنە بجھکرن.
پۆلیسێن ناڤخوە ژ کارووبارێن ناڤخوەیێن شنگالێ بەرپرسن و ژ دو رێڤەبەریان پێک تێ، یەک ژ وان ل ناڤەندا شنگالێ ویا دویەم ل ناحیا سنوونێیە، کو ھەژمارا وان 8 ھەزار پۆلیسن.
پشتی بوویەرێن 16ێ ئۆکتۆبەرا 2017ێ و ھاتنا ھێزێن حەشدا شەعبی بۆ شنگالێ، حەشدا شەعبی بوویە خوەدی ھێزا ھەری مەزن، زێدەتری 21 ھەزار چەکدار د بن ناڤێن جودا جودا دا ھەنە، کو چەندین رێیێن سەرەکی د دەستێ وان دا نە، ب دەھان رێبەند ب ھەڤبەشیا لگەل ئارتێشا ئیراقێ داناینە.
پشتی ھاتنا پەکەکێ د سالا 2014ێ دا، یەبەشە و یەژەشە و ھێزێن ئاساییشا ئێزدخانێ ھاتنە دروستکرن و 4 ھەزار چەکدارێن وان ھەنە، کو ژ وان 3 ھەزار چەکدار ژ ئالیێ حەشدا شەعبی ڤە مووچە پێ دهێتە دایین، لێ بەلێ ئاساییشا ئێزدخانێ ژ ئالیێ حکوومەتا ئیراقێ ڤە ب نەیاسایی ھاتیە ناسین، نھا دەڤەرا گر عزێر، کۆمەلگەھا گرزرەک، سیبا شێخدرێ، سکینێ، ھەیالێ، بازگەھا ئوم دیبان و ناحیا خانەسۆر د بن کۆنترۆلا وان دا نە.
فەرمانداریا شنگالێ کو سەر ب ھێزێن پێشمەرگەیە، پشتی بوویەرێن سالا 2017ێ ڤە تەنێ مەزارگەھا شەرفەدین کۆنترۆل کرنە، کو 700 پێشمەرگە نە، ژ ھێزێن پاراستنا ئێزدخانێ ژی، کو سەر ب وەزارەتا پێشمەرگە نە و ھەزار پێشمەرگە ھەنە و نھا ل باکور و باشوورێ چیایێ شنگالێ ب جھ بوونە، کو نێزیکی 20 بازگەھێن وان لگەل پۆلیس و ئارتێشا ئیراقێ ھەنە. ھەروھا ل ناڤەراستا ناڤچەیا شنگالێ و ناحیا سنوونێ فێرگەھەکا راھێنان و دو بنکە و بارەگەھێن وان یێن سەرەکی ھەنە.
تەڤی ھەبوونا ھەموو وان ھێزێن گرووپێن چەکدار ل شنگالێ و ھەژمارەک ئالیێن سیاسی بارەگەھێن وان ھەنە، لێ بەلێ رەوشا شنگالێ ھین ژی وەکە خوە مایە و خەلکێ وێ ژی ئاوارە نە.
