رۆژ ناچە کو هن ژ زارۆکێن کورد ب دەستێ پەکەکێ نەبن قوربانی، پەکەکە ژ زارۆکێن کوردان رە بوویە دۆژەهـ، دۆژەهەک ئەوقاس ب گوڕ کو نە ب تەنێ جەسەدێ ڤان جوانێن کورد دشەوتینە، بەلکو کەزەبا دایک و بابێن وان ژی دشەوتینە.
قوربانی کرنا زارۆکێن کورد، ژ بۆی «دەمۆکراتیک کرنا ترکیا و ئازادکرنا رێبەرێ پەکەکێ» ددۆمە، هەری داوی، ناڤەندا راگھاندن و چاپەمەنییا هه‌په‌گێ، ناسناما 6 زارۆكێن کورد ئەشکەرە کر کو ل زاپێ ب دەستێ لەشکرێ ترکیێ هاتنە کوشتن.
هه‌په‌گێ، د داخویانییا خوە دا ئەشکەرە کر، دەولەتا ترک ئێریشێن هەری گران دکە سەر کورەژارۆ، ژ بەر ڤێ یەکێ د 23-25گولانێ دە 6 گەریلایێن وان جانێ خوە ژ دەست دا نە.
پشتی قوربانیکرنا ڤان زارۆکێن کوردان، پەکەکە وەکە هەرتم هاتییە و دخوازە ب هێزا پەیڤان مالباتێن ڤان زارۆکان ب خوە ڤە گرێ بدە و ب ئاوایەک ئەفسانەیی پەسنا وان ددە، لێ پەکەکە هەر چ قاس پەسنا ڤان زارۆکێن کورد بدە نایێ همبەر دلۆپه‌ك ژ خوینا وان.
هەر وها هه‌په‌گه دبێژە: «ھەڤالێن مە بنەڤش، رۆژبین، چیا، بێریتان، رۆنی و دەڤرانێن کو ھەر یەک ژ وان فەرماندارێن پێشەنگ و زارۆکێن ھێژا یێن گەلێن مە بوون دیار کرن چ ببە ژی ئەوێ دەڤ ژ ھەقیقەتا بەرخوەدانا ئاپۆیی بەرنەدن».!!
لێ حەقیقەتا بەرخوەدانا ئاپۆیی ئەو بوو یا کو ل پایتەختا کینیایێ نیشاندای و رازی نەبووی چەکا پاسەوانا خوە وەرگرە و ل بەر خوە بدە، دەما ئۆجالان گۆتی «ئەز بەرخوەدانەک کلاسیک ناکم» راستییا ئۆجالان خوەیا بوو، پشترە دەما د بالەفرێ دا راگهاندی، «دایکا من ترکە، ئەز ژ بۆ خزمه‌تكرنا ترکیێ ئامادەمە، دەرفەتەکی ب من بدن»، هەر وها ئاخافتنێن وی یێن ل ئیمرالیێ تەڤ ڤێ یەکێ تەکەز دکن کو ئاپۆ ت جاران ل بەر خوە نەدایە و مرۆڤەک ترەسۆنەک بوویە، له‌وما سووچەک مەزنە پەکەکە بەرخوەدانا ڤان زارۆکێن کورد وەکە بەرخوەدانا ئاپۆیی بناڤ بکە.
