پارێزگارێ دهۆکێ راگهاند، ره‌فتارێن په‌كه‌كێ نەمرۆڤانەنە و باوەریا ڤێ رێخستنێ ژی ب کوردایەتی و کوردستانێ نەمایە.
پارێزگارێ دهۆکێ عەلی تەتەر، ئیرۆ ل سەر چیایێ مەتینا ل دەڤەرا ئامێدیێ یا دهۆکێ، د مەراسیما ببیرانینا 5 پێشمەرگەیێن کو ل سالا بووری د هێرشا چەکدارێن په‌كه‌كێ دا شەهید بووین، گۆتارەک پێشکێش کر.
عەلی تەتەر گۆت: «په‌كه‌كه زێدەتری 30 سالانە گوندێن مە وێران دکەت و هەول ددەت پێشیا پرۆژەیێن حکوومەتا کوردستانێ بگریت و ناهێلیت حکوومەت وان دەڤەران ئاڤەدان بکەت».
عەلی تەتەر هەروه‌ها گۆت: «په‌كه‌كه دخوازیت ڤێ ئازادیا کو ل هەرێما کوردستانێ هەیە، ژ ناڤ ببەت. د دەمەکێ دا کو بەحسا خەباتا دەمۆکراتیزەکرنا سووریە و ترکیێ دکەت، لێ شەر ئینایه ناڤ مالێن مە».
پارێزگارێ دهۆکێ بانگ ل په‌كه‌كێ کر و گۆت، ئەگەر ب راستی دخوازن خەباتێ بکه‌ن، بلا عه‌فرین و سەرێ کانیێ رزگار بکه‌ن و مەیدانا خەبات خوە ببن ناڤ خاکا ترکیێ و ل وێرێ ئاریشەیێن خوە چارەسەر بکه‌ن.
ب گۆتنا عەلی تەتەر، ره‌فتارێن په‌كه‌كێ نەمرۆڤانەنە و باوەریا وان ب کوردایەتی و کوردستانێ نەمایە.
