جوانێن شۆرەشگەر 2 برا ژ باژارێ حەلەبێ رەڤاندن

جوانێن شۆرەشگەر 2 برا ژ باژارێ حەلەبێ رەڤاندن

تەڤگەرا جوانێن شۆرەشگەر یا سەر ب رێڤەبەریا خوەسەر ڤە، 2 زارۆکێن کوردێن 9 و 10 سالی ل باژارێ حەلەبێ رەڤاندن.

ل گۆر زانیاریان، رێخستنا جوانێن شۆرەشگەر پێر 4 خزیرانێ ل تاخا «شێخ مەقسوودا حەلەبێ» دو برایێن بچووک «ئیبراھیم و محەمەد شەوقی یووسف» ب ئارمانجا بچەککرنا وان، رەڤاندن.

ئیبراھیم 9 سالی و محەمەد 10 سالییە و ئەو ھەر دو ژ کوردێن عەفرینێ نە و لگەل مالباتا خوە دا ل حەلەبێ دمینن.

هات زانین دەما محەمەد و ئیبراھیم ژ کارگەھا جلوبەرگ دورینێ دەرکەتین و بەر ب مالە ڤە دچوون، ژ ئالیێ ئەندامێن تەڤگەرا جوانێن شۆرەشگەر ڤە ھاتن رەڤاندن.

تاخا شێخ مەقسوودا حەلەبێ، وەک تاخا کوردان دهێتە ناسین و د دەستێ یەکینەیێن پاراستنا گەل (یەپەگێ) دایە. پشتی داگیرکرنا عەفرینێ ژ ئالیێ ئارتێشا ترکیێ و گرووپێن چەکدارێن سەر ب وێ ڤە، ھەژمارەک مەزن ژ کوردێن عەفرینێ لێ ب جھ بوونە.

تەڤگەرا جوانێن شۆرەشگەر، رێخستنەک سەر ب رێڤەبەریا خوەسەر ڤەیە و بەرێ گەلەک زارۆک و جوانێن کورد ل ھەرێمێن جودایێن کوردی رەڤاندبوون و بچەک کربوون.

مالباتێن زارۆکێن رەڤاندی کریارێن تەڤگەرا جوانێن شۆرەشگەر شەرمەزار دکن و بانگ ل رێخستنێن کو گرینگیێ ددن مافێن زارۆکان، رێخستنێن ناڤدەولەتی و ئالیێن پێوەندیدار دکن کو فشارێ ل رێڤەبەریا خوەسەر و ھێزێن سووریەیا دەمۆکراتیک (ھەسەدێ) بکن تا کو چارەنڤیسا زارۆکێن وان دیار بکن.

پوستێن ھەمان بەش