وەزارەتا ناڤخوە یا ترکیێ راگهاند کو هێزێن وان ل پارێزگەها مووشێ یا باکورێ کوردستانێ، ئۆپەراسیۆنەکە نوو یا ب ناڤێ «ئابلوکا-16 (دۆرپێچ-16)» دانە دەستپێکرن.
ل گۆر داخویانیا وەزارەتا ناڤخوە یا ترکیێ، ئیرۆ ئێكشه‌مبێ 12ێ خزیرانا 2022ێ ل پارێزگەها مووشێ یا باکورێ کوردستانێ، ب ناڤێ «ئابلوکا-16 (دۆرپێچ-16)» ئۆپەراسیۆنەکا نوو ب ل دژی رێخستنا په‌كه‌كێ هاتییە دەستپێکرن.
د داخویانیێ دا تێ گۆتن کو هێزێن تایبەتێن جەندرمە، پۆلیس و کۆماندۆ ژی د ناڤ دە 578 ئەندامێن ئارتێشا ترکیێ د ڤێ ئۆپەراسیۆنێ دە جهـ دگرن کو ژ چەند تیمان پێک تێن.
ل پارێزگەها موشێ 28ێ گولانا 2022ێ ژی ئۆپەراسیۆنەکە ب هەمان ناڤی «ئابلوکا-13 (دۆرپێچ-13) هاتبوو دەستپێکرن و 565 ئەندامێن ئارتێشا ترکیێ د ڤێ ئۆپەراسیۆنێ دە جهـ دگرتن.
وەزارەتا ناڤخوە یا ترکیێ بداویبوونا قۆناغا ئۆپەراسیۆنێن هەیاما زڤستانێ راگهاندبوو و ئاشکەرە کربوو کو د دەمسالا بهار و هاڤینێ دە ئەو دێ د بن ناڤێ «دۆرپێچ» دا رێزە ئۆپەراسیۆنێن نوو ل دەڤەرێن جودا یێن باکورێ کوردستانێ، ل دژی په‌كه‌كێ بده‌ن دەستپێکرن.
