جوانێن نەتەوی یێن کوردستانێ هوشداریەک توند ددەن هەدەپێ

جوانێن نەتەوی یێن کوردستانێ هوشداریەک توند ددەن هەدەپێ

جوانێن نەتەوی یێن کوردستانێ CNK داخویانیەک دا چاپەمەنیێ. د داخویانیێ دا ئێریشێن ھۆڤانە یێن ل سەر نرخێن کورد و کوردستانێ و ئێریشا دەڤکی و فیزیکی یا ل دژی نووچەگھانێ چاپەمەنیا کورد د بوویەرێن داوی دا ب توندی ھاتن شەرمەزارکرن. تەڤاھیا داخویانیا CNKعێ وھایە:

بۆ کوردستانیێن عەزیز و خەباتکارێن ھێژا یێن مەدیایێ

ئێریشێن ھەدەپێ و ھەڤالبەندێن وێ یێن دەمۆکراتکرنا دەولەتا داگیرکەر ژ بۆ خوە کرینە ئارمانج، بۆ سەر نرخێن نەتەوەیی یێن کوردستانێ رۆژ ب رۆژ دەوام دکە. د حەسابێن مەدیایا جڤاکی یێن رۆژنامەیا «یەنی یاشامێ» کو سەر ب ھەدەپێ ڤەیە، د ڤیدیۆنووچەیان دا تێ دیتن کو د دەما چالاکیا ھەدەپێ ژ بۆ رێبەرێ پەکەکێ ل «کادکۆ»یا «ستەنبۆلێ» کۆم دبن ھەدەپەیی ئێریشا فیزیکی ل سەر پەیامنێرێ ستەنبۆلێ یێ گرۆپا مەدیایی یا روداوێ دکن و سڤکاتی و خەبەران ژی دبێژن سەرۆک مەسعوود بارزانی.

د ھەر فرسەندێ دا ھەدەپەیی و ھەڤالبەندێن وێ ئێریشی ئالایێ کوردستانێ، ھەرێما کوردستانێ و سازیێن وێ یێن فەرمی، ھێزا مەشرووع یا پاراستنا ھەرێما کوردستانێ پێشمەرگە و ھەری داوی ژی ئێریشی رێبەرێ دامەزرینەرێ ھەرێما کوردستانێ مەسعوود بارزانی کرن. ئەم ڤان ئێریشێن ترسۆکانە و بێەدەبی یێن ھەدەپێ و ھەڤالبەندێن وێ ب تووندی شەرمەزار دکن. ئەم دەستوورێ نادن ئەو خەیالێن ھەدەپێ و ھەڤالبەندێن وێ ژ بۆ دژبەریا باکورێ کوردستانێ و ھەرێما کوردستانێ پێک وەرن و جارەکا دن ئەم ئاشکەرە دکن ھەر کی ئێریشی نرخێن نەتەوەیی بکە دێ مە ل ھەمبەری خوە ببنیە.

ل ئالیێ دن ئەم ئاشکەرا ژی دکن بێدەنگیا وان ئالیێن ب ناڤێ گۆیا “تففاقا کوردستانی” لگەل ھەدەپێ دا ھەڤکاریێ دکن و ژ ئێریش و خەبەرێن ھەدەپێ و ھەڤالبەندێن وێ یێن ژ بۆ نرخێن نەتەوەیی و سەرۆک بارزانی بێدەنگن ب تەنێ د دەما ھلبژارتنان دا و ژ بۆ بەرژەوەندی و کورسیان نرخێن نەتەوەیی ب بیرتینن.

وەکە جوانێن نەتەوەیی یێن کوردستانێ، ئەم بانگ ل وان ھەموو ئالیێن د بەرەیا داگیرکەرێن کوردستانێ دا جھ گرتنە دکین. ئالایێ کوردستانێ، سەروەریا ھەرێما کوردستانێ و دەزگەھێن وێ یێن فەرمی، رێبەرێ دامەزرینەرێ ھەرێما کوردستانێ سەرۆک مەسعوود بارزانی خەتا سۆرا ب ملیۆنان کوردانە. ئێریش و سڤکاتیێن ب ڤی رەنگی یێن ل نرخێن نەتەوەیی یێن کوردستانێ، نە جودا نە ژ ئێریشێن داگیرکەران ل بەرخوەدانا ئازادیێ یا مللەتێ مە.

ھەری داوی ئەم بانگ ل ھەدەپێ دکن کو  داویێ ل وان ئێریش و سڤکاتیان ل بەرامبەر نرخێن نەتەوەیی یێن کوردستانێ بینە و سینۆران د ناڤبەرا باکورێ کوردستانێ و ھەرێما کوردستانێ دا ئاڤا نەکە.

جوانێن نەتەوەیی یێن کوردستانێ

CNK

پوستێن ھەمان بەش