ژنا چالاکڤانا کوردا ئێزدی ئاشکەرا دکە، چەکدارێن پەکەکێ ل سینۆرێ شنگالێ بنکەیەکێ خوە نێزیک نەخۆشخانەیەکێ دانایە و مەترسیێ ل سەر ژیانا وەلاتیێن سڤیل چێدکن.
چالاکڤانا ژن «سوھام سەعید» راگەھاند: “خەلکێ ناحیەیا سنوونێ، ئەنجوومەنا گەلا سنوونێ و ئاساییشا ئێزیدخانێ ئاگاھدار کرنە کو ھێزێن چەکدارێن سەر ب پەکەکێ باژار ڤالا بکن. وان ھێزێن چەکدار بنکەیێن خوە نێزیک نەخۆشخانەیا سنوونێ داناینە، گەلەک جاران مە داخواز کریە ڤالا بکن و ل باژار دەرکەڤن، لێ دەرناکەڤن”.
ھەروھا گۆت، دوھ ل گەل بۆمبەبارانا ترکیێ ئێدی خەلک زێدەتر عاجز بوون. ژ بەر کو زارۆکەک بوو قوربانا سیاسەتا ئێزیدخانا پەکەکێ و خەلکێ مۆلەت دایە کو دەمەکێ نێزیک دا وی بنکەیێ ڤالا بکن.
سوھام سەعید گۆت ژی: “پەکەکێ ل سنوونێ تەنێ ئەو بنکەیا ئاساییشێ ھەبوو، گۆتینە خەلکێ ئەگەر ئەم سەدەم بن ئەم دێ ژ شنگالێ دەرکەڤین، لێ باوەر ناکم ژ شنگالێ دەرکەڤن. ژ بەر کو ئەگەر چووبان ھەتا نھا دا دەرکەڤن”.
ھەروھا دیار کر: “ل سنوونێ پۆلیسێ ھاتووچوونێ یێ پەکەکێ ھەیە، راوەستەکێن وان ھەنە، ھەروھا ل سنوونێ بنکەیێ ئێزیدخانێ یێ پەکەکێ ھەبوو و دوھ ھاتە بۆمبەباران کرن”.
پەکەکە و گرۆپێن گرێدایی وێ ل سینۆرێ شنگالێ، بنکەیێن خوە د کۆلان و مالێن ھەموەلاتیان دا دانینە کو خەلکێ وەک مەرتالێ زندی بکاربینن و خوە ژ بۆمبەبارانێن ترکیێ بپارێزن. ژ بەر وێ ژی گەلەک جاران خەلکێ سڤیل دبیتە قوربان و مال و حالێن وان وێران دبن و کۆچبەر دبن.