وەزارەتا پێشمەرگەیا حکوومەتا ھەرێما کوردستانێ ئاشکەرا کر د 29 پۆستێن بلندێن وەزارەتێ دا ب ئیمزایا وەزیرێ پێشمەرگە ڤە گوھارتن پێکھاتن.
د داخویانیا وەزارەتا پێشمەرگە دا ھات راگەھاندن: “پشتی گوھارتنا سەرفەرماندار و ئەمیندارێ گشتی یێ وەزارەتا پێشمەرگە، ئیرۆ ژی 20/6/2022یێ وەزیرێ پێشمەرگە شۆرەش ئیسمایل گوھارتنا 29 پۆستێن پایەبلند د وەزارەتا پێشمەرگە دا ئیمزا کر.”
ھەروھا ھات راگەھاندن کو ئەڤ بریارا وەزیرێ پێشمەرگە، وەک پێنگاڤەکا دن یا گوھارتنێن ناڤ وەزارەتێ و پێشدەبرنا زێدەترا پرۆسەیا چاکسازیێ ھاتیە ئەنجامدان. ھەروھا پشتی بریارا خانەنشینی و جێبەجێکرنێ، دەرفەتا یاسایی و ئیداری ژ بۆ ئانینا پێشا خوینا نوو و کاراکتەرێن نوو ئاڤا بوویە.
د بەشەکا دن یا داخویانیێ دا ھات گۆتن: “ئەڤ گوھارتنا د پۆستان دا ھاتیە کرن د ئەنجاما پسپۆری و شارازایی د ھەموو واران دایە، وەک ئەرکێ ھەری گران ناڤ کارنامەیا چاکسازی و بەرنامەیا وەزارەتێ د ھەیاما کابینەیا نەھەم دا ھاتیە ئەنجامدان.”
