هات راگهاندن کو ل گوندێن «تل سالوور و برجکێ» سەر ب ناڤچەیا جندرێسێ یا عه‌فرین یا رۆژئاڤایێ کوردستانێ، پۆلیسێن سەربازی و ئیستخباراتا ترکیێ د ڤێ حەفتیێ دا 3 وەلاتیێن کورد گرتنە.
ژ ئالیێ خوە ڤە بەردەڤکێ رێخستنا مافێن مرۆڤان یا عه‌فرینێ، ئیبراهیم شێخۆ راگهاند، ل گوندێن «تل سلوور و برجکێ» سەر ب ناڤچەیا جندرێسێ یا عه‌فرینا رۆژئاڤایێ کوردستانێ، پۆلیسێن سەربازی و ئستخباراتا ترکیێ د ڤێ حه‌فتیێ دا 3 وەلاتیێن کورد گرتنە و هەتا نها چارەنڤیسا وان نەدیارە.
13ێ هەزیرانێ ژی، ل گوندێ «کەفر سەفرە» سەر ب ناڤچەیا جندرێسێ، گرووپا لیوایا سەمەرقەند سەر ب ترکیێ ڤه، 2 وەلاتیێن کورد ب تۆهەمتا پەیوەندیا ل گەل رێڤەبەریا خوەسەر گرتبوون.
ئارتێشا ترکیێ و گرووپێن چەکدارێن یێن توندرەو کو سەر ب ئۆپۆزسیۆنا سووریێ ڤەنە و ترکیە پشتەڤانیا وان دکەت، رۆژا 20ێ چلەیا 2018 ئێرشەکا بەرفرەها بەژایی و ئاسمانی بۆ سەر عه‌فرینێ دان دەستپێکرن کو د بن کۆنترۆلا هێزێن کوردی دا بوو.
پشتی وێ ئێرشا بەرفرەها ب هەر جۆر چەکێن گران، باژارێ عه‌فرینێ رۆژا 18 ئادارا 2018 کەت بن داگیرکەریا ئارتێشا ترکیێ و گرووپێن چەکدار.
د ئەنجاما ئێرشێن گران و کەتنا باژێر بۆ دەستێ چەکداران دا، ب سەدان هەزار خەلکێ کورد مال و وارێن خوه ب جی هشتن و کەتن سەر ریێن کۆچبەریێ.
هەروه‌ها ژ وێ رۆژا کو عه‌فرین کەتیه بن داگیرکرنا ئارتێشا ترکیێ و کۆمێن چەکدارێن ئۆپۆزسیۆنا سووریێ دا، بنپێکاریێن ل هەمبەر وەلاتیێن کورد ل وێ هەرێمێ بەردەوامن.
