ھەڤسەرۆکا مەسەدێ ئیلھام ئەحمەد گۆت کو رێڤەبەریا خوەسەر تێکلیێن خوەیێن خورت لگەل سوێدێ دا ھەنە.
سوێدێ ب رێیا رێخستنێن ئالیکاریێ پشتگری دا رۆژئاڤا و وەزیرا دەرڤەیا سوێدێ ژی چەند جاران پێشوازیێ ل رایەدارێن رێڤەبەریا خوەسەر کر.
پشتی گەفێن رووسیایێ ژ بۆ کو سوێد ببە ئەنداما ناتۆیێ پێویستی ب ئەرێکرنا ترکیێ ھەیە. لێ بەلێ، ئەنقەرە ژ ستۆکھۆلم دخوازە کو د بەردێلا ئەرێکرنا وێ دا پەکەکێ وەکە رێخستنەک تەرۆریستی قەبوول بکە و رێگریێ ل چالاکیێن وێ یێن ل سوێدێ بکە و ب ت ئاوا ئالیکاریا وێ و رێخستنێن دن یێن سەر ب وێ ڤە نەکە.
ھەڤسەرۆکا دەستەیا رێڤەبەرا ئەنجوومەنا سووریا دەمۆکراتیک (مەسەدە) ئیلھام ئەحمەد د ھەڤپەیڤینا خوەیا د مەدیا دەولەتێ یا رووسیایێ «رووسیا تۆدەی» دا گۆت کو ئەو لگەل سوێدێ دا خوەدی تێکلیەکە پر باشن.
ئیلھام ئەحمەد دبێژە “ئەم د پەیوەندیێ دا نە و تێکلیێن مەیێن خورت لگەل حکوومەتا سوێدێ دا ھەنە، ل سەر وێ یەکێ کو ئەم وەکە ئەنجوومەنا سووریەیا دەمۆکراتیک پێکھاتەیەکا سیاسی ل سووریێ نە. ئەم ب بەردەوامی د ناڤ پێوەندی و دانووستاندنان دا نە و ئەم ھێڤیدارن کو د ڤی واری دا چ رەفتارێن خراب دەرنەکەڤن.”
رایەدارێن رۆژئاڤایێ کوردستانێ دان زانین کو ستۆکھۆلمێ ب دەھان ملیۆن دۆلاران ئالیکارییا ئابۆری ب رێیا رێخستنێن کورد و بیانی دایە ھەرێمێ. ترکیێ ئیدیعا دکە کو ئەڤ پشتگری ژ بۆ چەکدارێن پەیەدێ کو بەشەکن ژ پەکەکێ ھاتیە شاندن، ترکیە ڤێ یەکێ وەک مەترسیەک ل سەر ئەولەھیا خوەیا نەتەوی دحەسبینە.
ل ئالیێ دن سوێد ژی پشتگریا راستەراستا ژ بۆ پەیەدێ رەد کر و گۆت کو ئەڤ ئالیکاری ژ بۆ رێخستنێن مرۆڤی یێن کو ل سووریێ کار دکن تێن دایین.
