رێخستنا ب ناڤێ “جوانێن شۆرەشگەر” یا سەر ب رێڤەبەریا خوەسەر ڤە، زارۆکەکی دن یێ کورد ل باژارێ حەلەبێ رەڤاند، دا کو وی بکن چەکدارێ وێ رێڤەبەریێ.
ژێدەرێن خوەجھی ژ باژارێ حەلەبێ بەلاڤ کرن، تەڤگەرا جوانێن شۆرەشگەر دوھی چارشەمبێ 22یێ خزیرانا 2022یێ، ل تاخا شێخ مەقسوودا ل حەلەبێ، زارۆکێ 14 سالی «ئەحمەد ھەیسەم جەفۆ» دەما ژ دبستانا خوە «دبستانا میکایل نایما» دەردکەت، رەڤاند.
ئەحمەد ھەیسەم جافۆ، د سالا 2008ێ دا ژ داییک بوویە، ژ گوندێ «کورزەلا» یێ ناڤچەیا «شێراوا» یا عەفرینێیە.
ئەڤ یەک د دەمەکێ دایە، دوھ کەچا ژ باژارێ عەفرینێ حەمرین حەبەش ژ بۆ كوردستان 24ێ راگھاندبوو، ھێزەکا سەر ب رێڤەبەریا خوەسەر برایێ وێ یێ 17 سالی ب ناڤێ «محەمەد زەکەریا حەبەش» ل رۆژا 13/6/2022یێ ڤە ژ تاخا ئەشرەفیێ یا حەلەبێ رەڤاندیە و ھەتا نھا چارەنڤیسا وی نە دیارە.
حەمرین حەبەش ب رێیا کوردستان 24ێ بانگ ل رێخستنێن کو گرینگیێ ددن مافێن زارۆکان، رێخستنێن ناڤدەولەتی و ئالیێن پێوەندیدار کر کو فشارێ ل رێڤەبەریا خوەسەر و ھێزێن سووریەیا دەمۆکراتیک (ھەسەدێ) بکن تا کو چارەنڤیسا کورێ وی دیار بکن.
تاخێن ئەشرەفیێ و شێخ مەقسوودێن حەلەبێ، وەک تاخا کوردان تێ ناسین و د دەستێ یەپەگێ/ھەسەدێ دانە و رێڤەبەریا خوەسەر ژی لێ ھاتیە راگھاندن. پشتی داگیرکرنا عەفرینێ ژ ئالیێ ئارتێشا ترکیێ و گرۆپێن چەکدارێن سەر ب وێ ڤە، ھەژمارەک مەزن ژ کوردێن عەفرینێ لێ ب جھ بوونە.
