ئەنەکەسە ئامادەکاریێن لدارخستنا کۆنگرەیا خوە دکە

ئەنەکەسە ئامادەکاریێن لدارخستنا کۆنگرەیا خوە دکە

ئەنجوومەنا نشتیمانی یا کورد ل سووریێ (ئەنەکەسە) ئامادەکاریێن لدارخستنا چارەمین کۆنگرەیا خوە دکە. بریارە ئەنەکەسە د ھەیاما 45 رۆژان دا، کۆنگرەیا خوە یا 4ێ لدار بخە.

ئەندامێ دەستەیا سەرۆکاتیا ئەنەکەسێ «فەیسەل یووسف» بەشداری بولتەنا رووداوێ بوو و دا زانین کو وان بریار دایە د دەما کێمتر ژ مەھەک و نیڤێ، کۆنگرەیا 4ێ یا ئەنەکەسێ ئەنجام بدن و گۆت: “ئەم ل گەل ئالیێن بەرپرس د پەیوەندیێ دا نە ژ بۆ کو کۆنگرەیا خوە ل قامشلۆ لدار بخن.”

دەربارێ ئامادەکاریان دا «فەیسەل یووسف» گۆت کو ژ سالا 2017ێ ڤە ژ ئالیێن “چەکدارێن سەر ب پارتیا یەکیتیا دەمۆکراتیک (پەیەدێ)” ڤە ئاستەنگی ل بەر وان ھەیە کو کۆنگرەیا خوە ساز بکن و وھا دۆماند : “ژ ھەموو ھەرێمێن رۆژئاڤایێ کوردستانێ دێ ئەندام، کەسێن سەربخوە و ئاکادەمسیەن بەشدار ببن. ئامادەکاری بەردەوامن و ژ بۆ ڤێ یەکێ دانووستاندنێن مە بەردەوامن.”

فەیسەل یووسف تەکەز کر کو ھەندەک ناکۆکی د ناڤبەرا دو پارتیێن ناڤا ئەنەکەسێ دا ھەبوون، لێ ب چارەسەریەکێ کو ھەردوو ئالی رازی بن، داوی ل وێ ناکۆکیێ ھاتیە.

ئەندامێ دەستەیا سەرۆکاتیا ئەنەکەسێ، دەربارێ ئەگەرا ھەبوونا چ گەرەنتیەکێ ژ بۆ ئەنجامدانا کۆنگرەیێ دا گۆت، ئەو دێ ل سەر بنگەھا گەرەنتیا بەرێ یا ئامەریکا کو دڤێت ئەنەکەسە ب ئازادی کارێ خوە بکە، کۆنگرەیا خوە ئەنجام بدن.

فەیسەل یووسف ھەروھا دا زانین کو ئەو ئامادە نە د بن چاڤدێریا ئامەریکایێ دا ل سەر دیالۆگا کوردی-کوردی بەردەوام بن.

کۆنگرەیا سێیەمین د 16 خزیرانا 2015ێ دا ل قامشلۆ ھاتبوو سازکرن. ئەنەکەسە ژ دەستپێکا دامەزراندنا خوە دا خوە بەشەک ژ ئۆپۆزسیۆنا سووریێ دبینە.

پوستێن ھەمان بەش

کێ «ئوگور مومجوو» کو گۆتبوو دێ په‌یوه‌ندیێن «ئۆجالان و میتێ» ئاشکرا که‌م، کوشت؟

ugur mumca-darkamazi-arami