چاڤدێرەکێ سیاسی دبێژە، پەکەکە گەلەک جاران فەرماندەیێن خوە ددە کوشتن و کوشتنا وان ژی ڤەدشێرە. میناکا وێ ژی فەرماندەیا پەکەکێ یا ب ناڤێ دەلال ئەزیزۆگلو.
دوھی ئاژانسا ئانادۆلویا ترکیێ راگەھاند، میتا ترکیێ د ئۆپەراسیۆنەکا تایبەت دا ل پارێزگرەھا سلێمانیێ یا ھەرێما کوردستانێ فەرماندەیەکا پەکەکێ ب ناڤێ دەلال ئەزیزۆگلو ب کۆد ناڤێ راپەرین کوشتیە.
نڤیسکار و چاڤدێرێ سیاسی «حامید گەوھەری» ل سەر ڤێ مژارێ نڤیسەک نڤیسیە و ب گومان ل کوشتنا وێ چەکدارا پەکەکێ نێریە و گۆتیە: پەکەکە چما کوشتنا دەلال ئەزیزۆگلو ڤەدشێرە!؟
حامید گەوھەری گۆتیە، ب گومانا ھەری مەزن، پەکەکێ ئەو فەرماندەیا خوە دایە کوشتن ژ بەر کو ئەڤ نە جارا یەکێیە تشتەکی وسا روو ددە. د ھەیاما چەند رۆژێن بۆری دا ئەڤ سێیەمین جارە پەکەکە خیانەتێ ل سەرکردە و کادرۆیێن خوە دکە و وان ددە کوشتن.
وی نڤیسکار و چاڤدێرێ سیاسی دایە زانین، ھەتا نھا پەکەکێ تشتەک ل سەر کوشتنا دەلال ئەزیزۆگلو نەگۆتیە. ئەڤ نیشان ددە کو کوشتنا وێ فەرماندەیێ و دو کادرۆیێن دن ب گومانە و ب سیخورتیا بەرپرسێن پەکەکێ ھاتنە کوشتن.
حامید گەوھەری بەحسا دو ئێرشێن دن دکە و دبێژە، رۆژا 15ێ ڤێ مەھێ درۆنێن ترکیێ جڤینەکا ڤەشارتی یا پەکەکێ ل ناحیا سنوونێ یا شنگالێ کرن ئارمانج. د وێ ئێرشێ دا گەلەک کوشتی و بریندار ھەبوون. رۆژا 17 ڤێ مەھێ ژی ترۆمبێلەکا پەکەکێ ل کەلارێ راستی ئێرشا درۆنێن ترکیێ ھات. د وێ ئێرشێ دا ژی بەرپرسەکێ پەکەکێ ب ناڤێ فەرھاد شیبلی، کو خەلکێ رۆژئاڤایێ کوردستانێ بوو، ھات کوشتن. ژ بلی بەرپرسێن پلەبلندیێن پەکەکێ چ کەسێ نەدزانی ئەو ھاتیە باشوورێ کوردستانێ.
