ل دادگەھا دیاربەکرێ هەشتەمین روونشتنا دۆزا کوشتنا پارلەمەنتەرێ پارتیا دەمۆکراسیێ (DEP) محەمەد سینجار برێڤە چوو. دۆز، ژ بۆ 12ێ کانونێ ھات پاشخستن. مالباتا محەمەد سینجار راگھاند، ھەتا کو ئەو بگھن ئەنجامەکێ دەست ژ تێکۆشینا یاسایی بەرنادن.
ل شەشەمین دادگەھا سزایێن گران یا دیاربەکرێ، هەشتەمین روونشتنا دۆزا کوشتنا پارلەمەنتەرێ DEPێ محەمەد سینجار کو د 1993یێ دا ل ئێلھێ ھات کوشتن، برێڤە چوو. شاندەیا دادگەھێ ھەموو داخوازێن مالبات و پارێزەران رەد کر. روونشتنا دۆزێ بۆ 12ێ کانوونێ ھات پاشخستن.
پشتی روونشتنێ، مالباتا محەمەد سینجار، پارێزەرێن مالباتێ، رێڤەبەرێن رێخستنێن جڤاکا سڤیل و سیاسەتمەدارێن ھەدەپێ ل بەر دادگەھێ داخویانیەک دان.
جیھان سینجارا ھەڤژینا محەمەد سینجار گۆت؛ ژ بۆ کو بوویەر رۆنی ببە ھەتا نھا ژ ئالیێ رایەدارێن ترکیایێ ڤە چ گاڤ نەھاتنە ئاڤێتن. جیھان سینجار ئاماژە کر کو؛ دێ تێکۆشینا وان ژ بۆ ھەموو کوشتنێن کریار نەدیار دەوام بکە.
پەیڤدارا ھەدەپێ «ئیبرو گونای» ژی رەخنە ل سیاسەتێن دەستھلاتداریێ گرتن و گۆت؛ دڤێت ل پارلەمەنتۆیێ کۆمیسیۆنەک بهێت ئاڤاکرن و دەربارێ کوشتنا محەمەد سینجار دا لێپرسینەک بهێت کرن و ئەڤ بوویەرە زەلال ببە.
پارلەمەنتەرێ DEP یێ مێردینێ محەمەد سینجار، د 1993یێ دا ژ بۆ کو دەربارێ کوشتنێن کریار نەدیار دا لێکۆلینێ بکن ل گەل 6 پارلەمەنتەران سەردانا باژارێ ئێلھێ کربوو. شاندەیا پارلەمەنتەران ھاتبوو گولەبارانکرن و محەمەد سینجار و ئەندامەکێ دی یێ DEP ھاتبوون کوشتن.
