سەرۆکوەزیرێ هەرێما کوردستانێ مەسروور بارزانی راگهاند، ئەو ب حكوومه‌تا فەدەرال رە کار ل سەر داگرتنا وێ ڤالاهیا ئەولەهیێ یا هەیە دکن و کار تەمام بوونە، لێ بەلێ هەتا نها وەزارەتا دارایی یا فەدەرالی فینانسا وێ پرۆژەیێ تەرخان نەکریە.
سەرۆکوەزیرێ هەرێما کوردستانێ مەسروور بارزانی، ئیرۆ چارشەمبێ 29ێ خزیرانا 2022ان سەردانا پێشانگەها تەکنۆلۆژی یا HITEX ل هەولێرێ کر و ل ور ژ رۆژنامەڤانان رە گۆت: «دلخوەشم کو ئیرۆ سەردانا ڤێ پێشانگەهێ دکم. دیتنا ڤێ پێشانگەهێ و ڤان جوانان، جهێ دلخوەشیێ و هێڤیەکە مەزن یا گەلێ مەیە، ئەم وەک حكوومه‌تا هەرێما کوردستانێ، پشتەڤانیێ ل وان دکن و گەلەک بەرنامەیێن مە ژ بۆ هەڤکاریا زێدەتر ل جوانان و پەیداکرنا دەرفەتێن کار ژ وان رە هەیە».
HITEX پێشانگەهەکە سالانە یا تەکنۆلۆژیا ئاگاهی و ئەلەکترۆنیکە، مەزنترین پێشانگەها تەکنۆلۆژی ل ئیراقێ یە و بۆ جارا سێیەم ل هەولێرێ تێ ڤەکرن، د پێشانگەهێ دە 15 کۆمپانیا ژ 30 وەلاتان بەشدارن. پێشانگەهـ رۆژا 27ێ حزیرانێ ڤەبوو و هەتا 30ی خزیرانێ بەردەوام دبە.
سەرۆکوەزیر مەسروور بارزانی دەربارێ ئێریشێن ل سەر کێلگەهێن پەترۆلێ دە گۆت: «مە ب سەرۆکوەزیرێ ئیراقێ و ئالیێن پێوەندیدار رە گوفتووگ کرنە کو ژ ئالیەکی کەسێن دەریاسایی ڤە ئەڤ ئێریش تێن کرن و حكوومه‌تا ئیراقێ ژی ل وێ یەکێ موکر هاتیە کو یێن ڤان کاران دکن ناسکرینە، ئەم هەول ددن ب هەڤ رە هەڤکار بن ژ بۆ داوی ل ڤان ئێریشان بێ».
دەستنیشان کر ژی: «ئەم ب حكوومه‌تا ئیراقێ رە ل سەر خەتێنە، ژ بۆ ئەو ڤالاهیا ئەولەهیێ یا هەیە، بێ داگرتن. ئەو لیوایێن هەڤبەشێن بریارا پێکانینا وان هاتیە دایین، کارێن پێکانینا وان تەمام بوویە، لێ بەلێ کارێ کو سەر ملێ حكوومه‌تا فەدەرالی یە، جبجی نەکریە و وەزارەتا دارایی فینانسا وێ پرۆژەیێ نەکریە».
هەر وها سەرۆکوەزیر مەسروور بارزانی تەکەزی ل سەر وێ یەکێ کو داگرتنا وان ڤالاهیێن ئەولەهیێ، گەلەکی هەڤکار دبە ژ بۆ ئالیێن دەریاسایی و تەرۆرستی نکاربن جارکە دن ئێریشی سەر هەرێما کوردستانێ بکن.
