پەیەدە ل سەر نەدیارکرنا چارەنڤیسا حەمید ئیدێ رژدە

پەیەدە ل سەر نەدیارکرنا چارەنڤیسا حەمید ئیدێ رژدە

ئیرۆ 1ێ تیرمەھا 2022یێ، ئەنجوومەنا نشتیمانییا کوردی ل سووریێ، داخویانیەک ژ بۆ رایا گشتی بەلاڤ کر، تێ دا بانگا سەربەستبەردانا حەمید ئیدێ و ھەموو گرتی و رەڤاندیان کر و گۆت کو پەیەدە ل سەر نەدیارکرنا چارەنڤیسا حەمید ئیدێ رژدە.

ئەنەکەسێ د داخویانیا خوە دا وەھا گۆتیە: ھەڤدەمێ کو وەلاتیێن کورد د رەوشەکا ئابووری و ئەولەکاری یا خەراب دا دەرباس دبن، رێڤەبەریا پەیەدێ د ئاستەنگکرنا ژیانێ، د رێیا کریارێن ترساندن، ژ رەڤاندن و گەفلێکرنێ دا، بەردەوامە، دا کو وەلاتی د رەوشەکا نەئارام و نەسەقامگیر دا بژین.

ئەنکسێ دا زانین: د 12ێ مەھا خزیرانا بووری دا حەمید مەروان ئیدێ، ئەندامێ پارتیا یەکیتی کوردستانی -سووریا، ل باژارێ عاموودێ، راستی بەردانا گولەیان و ھەولا کوشتنێ ھات پشترا ھات رەڤاندن و ئۆتۆمبێلا وی ھات دەستەسەرکرن، تەڤی بانگێن سەربەستبەردانێ ھین ژی چارەنڤیسا وی نە دیارە، کو ئەڤ کریار و بنپێکرن ژی د دەمەکێ دا تێن، ژ بەر سیاسەتا پەیەدێ خەلکێ دەڤەرێ ژ ئەنجاما رەوشا ئابوورییا تێکچوویی، دنالن.

ئەنەکەسێ، کریارێن پەیەدێ ب توندی شەرمەزار کرن، و بانگا دیارکرنا چارەنڤیسا حەمید ئیدێ و ھەموو گرتیان کر.

د داویا داخویانیا خوە دا ئەنەکەسێ بانگ ل ئالیێ ئەمەریکی کر کو ب ئەرک و بەرپرسیارەتیا خوە رابە، فشارەکێ ل رێڤەبەریا پەیەدێ و قەسەدێ بکە دا کو دەست ژ ڤان کریاران بەردن و ئێدی ھەر کەسەکێ کو نە ھەڤنێرین بە ب پەیەدێ نەیێن گرتن و رەڤاندن.

پوستێن ھەمان بەش