پاکێ قوربانیێن کۆمکوژیا سێواسێ ب پەیامەکێ ببیرئانین

پارتیا ئازادیا کوردستانێ (پاک) ب بۆنەیا سالڤەگەرا 29ێ یا کۆمکوژیا سێواسێ، کو ل ھۆتێلا «مادماکێ» 33 کەسایەتێن رەوشەنبیر و ھونەرمەند ھاتن شەوتاندن و ژیانا خوە ژ دەست دان، ب داخویانیەکا نڤیسکی قوربانێن وێ کۆمکوژیێ ببیرئانین.

داخویانیا پاکێ وھایە:

ئەم کەسایەتێن کو د 2یێ تەمووزا 1993یێ دا د ھۆتێلا «مادماکێ» دا ھاتنە قەتل کرن  ب رێزداری ب بیر تینن.

د تەممووزا 1993یێ دا، ل سێواسێ، شاھییا «پیر سولتان عەبدال» ھاتە ل دار خستن. گەلەک رەوشەنبیر و ھونەرمەند ژی بەشداری ڤێ شاھییێ ببوون.

د رۆژا 2یێ تەممووزا 1993یێ دا قەلەبالغییەکا مەزن ئێریشەکا نە مرۆڤانە برن سەر ھۆتێلا «مادماکێ» یا کو بەشدارێن شاھییێ لێ دمان و ھۆتێل شەوتاندن. د ئەنجامێ دا 33 رەوەشەنبیر و ھونەرمەد و 2 خەباتکارێن ھۆتێلێ ھاتن شەوتاندن، ژ بەر دوکەلێ خەندقین.

ئێریشکەران ب سلۆگانێن وەکە “سێواس ژ بۆ یێن لایق دێ ببە مەزەل”، ل بەر چاڤێن پۆلیس و ھێزێن ئەولەکارییێ یێن دەولەتێ ئێریش بربوون سەر ھۆتێلێ.

ئەڤ ئێریش بنپێ کرنا مافێ ژیانێ بوو، ل دژی مافێ رامانی و باوەرییێن جودا بوو.

ب مناسەبەتا ڤێ کۆمکوژیێ ھندەک دۆز ھاتن ڤەکرن. لێ مخابن چ ئەنجام ژێ نەھاتن گرتن، ئەنجامدەر و پشتگرێن ڤێ کۆمکوژیێ ھەتا ئیرۆ ژی نەھاتنە ئاشکەرا کرن، نەھاتنە سزا دان.

ئەم ئەنجامدەر و پشتەڤانێن ڤێ کۆمکوژیێ و یێن ل پشتا وان بوون، یێن ئەو دپاراستن ب تووندی روورەش دکن.

ئەم د سالڤەگەرا 29ێ یا ڤێ کۆمکوژیێ دا، قوربانییێن کۆمکوژیێ ب گرامی ببیر تینن.

2/7/2022

نڤیسینگەها چاپەمەنی و راگەھاندنێ یا پاکێ