بریارە سبە رۆژا یەکشەمێ 3ێ تەمووزا 2022ێ، پارتیا دەمۆکراتیکا گەلان هه‌ده‌پێ، پێنجەمین کۆنگرەیا خوە یا ئاسایی ل ئەنقەرێ ساز بکەت.
ناڤەندا راگهاندنێ یا هه‌ده‌پێ بەلاڤ کریە کو کۆنگرە ب سلۆگانا «ئەم چارەسەرینە» و ب بەشداربوونا 50 هەزار ئەندام و ئالیگرێن هه‌ده‌پێ تێ ساز کرن، هەزار و 50 کەس ئەندامێن کۆنگرەیێ نە و ژ ئیرۆ ڤە ئەندام و ئالیگرێن هه‌ده‌پێ بەر ب ئەنقەرێ دکەڤن رێ داکو بەشداری کۆنگرەیێ ببن.
هه‌ده‌په د کۆنگرەیێ دا دێ چەندین ماددە و بەندێن پەیرەوا ناڤخوە سەڕاست بكه‌ت، ژ وان سەڕاستکرنا بەربژاربوونا هەردوو هەڤسەرۆکان، هەتا نها تەنێ مافێ هەڤسەرۆکەکی هەیە ببە بەربژێر، لێ ئەگەر سەڕاستکرن بهێته کرن و گوهەرتن دەنگێ ئەندامان بدەست بخە، ژ نها و شووندە مافێ هەردوو هەڤسەرۆکان هه‌یه خوه به‌ربژار بكن.
د کۆنگرەیێ دا ئەندامێن سەرکردایەتی، ئەنجوومەنا پارتیێ و هەڤسەرۆک تێن هلبژارتن، ل گۆر پەیرەوا ناڤخوە یا هه‌ده‌پێ، د هەر کۆنگرەیەکێ دا ل گۆر پیڤانەکا دیارکری، ژ سەدی 50ێ ئەندامێن سەرکردایەتیێ دهێن گوهەرتن و کەسێن نوو دهێن هلبژارتن.
رۆژا 30ێ حزیرانێ بەردەڤکا هه‌ده‌پێ ئەبرو گونای د جڤینا چاپەمەنیێ یا هەفتانە دا راگهاندبوو کو نەرینا گشتی ئەوە متهات سانجار و پەرڤین بۆلدان ل سەر ئەرکێ خوە بەردەوام بن و گۆتبوو، سەرکردایەتیەکا چالاک و ئاکتیڤ دێ هێته هلبژارتن داکو ل سەر خەبات و تێکۆشینا خوە بەردەوام بن.
