ده‌وله‌تا ترك هێزه‌كا مه‌زن ژ چه‌كدار و چه‌ته‌یێن ب ناڤێ «سپایێ نشتیمانی یێ سووریێ» ب چه‌كێن گران ڤه ل سینۆرێ تل رفعه‌تێ بجهـ كر، وه‌كه ئاماده‌كاری ژ بۆ ده‌ستپێكرنا ئۆپه‌راسیۆنێ.
ل گۆری ئاژانسا ئه‌نادۆل یا ده‌وله‌تا تركیێ، هێزه‌كا مه‌زن ژ چه‌كدار و چه‌ته‌یێن «سپایێ نشتیمانی یێ سووریێ» كو ژ هێلا تركیێ ڤه تێن پشتگری كرن، ب چه‌كێن گران ڤه ل سینۆرێ باژارێ تلرفعه‌تێ یێ رۆژئاڤا كوردستانێ هاتن بجهـ كرن.
ده‌ستنیشان كر، ئه‌ڤ هێز دێ به‌شداری ئۆپه‌راسیۆنا ل دژی هێزێن سووریه‌یا ده‌مۆكراتیك هه‌سه‌دێ ببیت.
ده‌وله‌تا تركیێ، ل رۆژێن رابووری ئه‌شكه‌ره كر كو ئه‌و دێ ده‌ست ب ئۆپه‌راسیۆنه‌كا مه‌زن ل باكور و رۆژهلاتا سووریێ ل دژی هه‌سه‌دێ بكه‌ت و دێ ناڤچه‌یه‌كا ئه‌وله‌هیێ ب كووراهییا 30كم ل وێرێ ئاڤا بكه‌ت.
ل گۆری پیلانا ده‌وله‌تا ترك، ئه‌ڤ ئۆپه‌راسیۆن دێ باژارێن منبج و تل رفعه‌تێ و هه‌روه‌ها كۆبانیێ ل خوه گریت و ڤێ ئۆپه‌راسیۆنێ ب كریار ده‌ستپێكریه ژ به‌ركو ئه‌ڤ ده‌ما چه‌ند رۆژانه ئارتێشا تركیێ و گرووپێن وێ یێن چه‌كدار تل رفعه‌تێ و ده‌ردوورا وێ تۆپباران دكن.
