گوندەکێ ناڤچەیا چەمچەمال یا سەر ب سلێمانیێ ژ بەر نیگەرانیا ژ بجھبوونا ھێزێن سەر ب پەکەکێ یێن نێزیکی گوندێ وان و ئێرشێن ترکیێ، ھات ڤالاکرن. ھندەک گوندێن دەردۆرێ ژی نیڤ ڤالا مانە و دهێت تەخمینکرن کو د دەمەک نێزیک دا ب تەمامی بێن ڤالاکرن.
د ڤان 4 سالێن داوی دا پەکەکێ ل گەلەک دەڤەرێن دەردۆرا سلێمانی و گەرمیانێ کامپێن لەشکەری ئاڤا کرنە. کامپێن پەکەکێ ب گوندان ڤە گرێدایی نە. ھەر چقاس دەما کو ھێزێن پەکەکێ ئەول جار ھاتن ڤان دەڤەران گەل ژ ھاتنا پەکەکێ نەرەحەت بوو ژی، لێ دەما کو فێم کری کو پشتی دەمەک کورت د وارێ ئابۆری دا مفا ژ پەکەکێ وەرگرتیە ژی بێدەنگ مان. پەکەکێ ل دکانێن گوندان بازرگانی دکر، ترۆمبێلێن خەلکێ کرێ دکرن و لگەل خەلکێ دا بازرگانی دکر کو کەلوپەلان بینە. ب دەرباسبوونا دەمی ڤێ یەکێ وەکر کو گەل پەکەکێ قەبوول بکە، ژ بەر کو ژ ئالیێ ئابۆری ڤە سوودمەند بوو.
لێ لگەل دەرباسبوونا دەمی گوندیان هەست پێ کر کو هندەک ئالیێن دن یێن ڤی کاری ژی ھەنە
پەکەکە ھەر کو دچوو زێدەتر دچوو ناڤا گوندان دا، دەستوەردانا ژیانا گەل دکر و گەف ل خەلکێ دکر. پەکەکە وەک رێخستنەکا مافیایێ زەختێ ل کەسێن کو وەک وان دخواست تەڤنەگەریان دکر.
ب تایبەت د 21ێ گولانێ دا دەما بالەفرێن ترکیێ ل نێزیکی گوندێ «تووتەگەلێ» یێ ناڤچەیا «ئاخچەلەر» یا «چەمچەمالێ» ل ترۆمبێلەکا کو سڤیل و ئەندامێن پەکەکێ تێ دا بوون خستی، پێڤاژۆیەکا ئالۆز دەستپێ کر. د وەساییتێ دا ئەندامەکێ مەجلیسا گوندێ «تووتەگەل» و سڤیلەکێ دن ژیانا خوە ژ دەست دان. پشتی ڤێ بوویەرێ خەلکی ھندەک داخوازێن نە ب دلێ پەکەکێ ژ پەکەکێ کرن.
ل گۆر زانیاریێن تایبەت یێن ب دەست «دارکا مازی» کەتی، گوندیان داخواز ژ ئەندامێن پەکەکێ کرنە کو ئێدی نەیێن گوندێن وان و کامپێن خوە ڤەگوھێزینن جھێن دوور، لێ پەکەکێ ئەڤ داخواز رەد کریە. ھەر وھا پشتی ئێریشا بالەفرێن بێ پیلۆت یێن ترکیێ پەکەکێ بەرۆڤاژی ڤێ زێدەتر خوە نێزی گوندان کر. ژ بەر ڤێ یەکێ د ناڤبەرا خەلکێ گوندان و پەکەکەییان دا پرسگرێک دەرکەت و خەلکێ گوندان نەچار مان گوندێن خوە ڤالا بکن.
ب راستی ئەڤ ڤالاکرنا گوندێ چەمچەمال نەیا یەکەمە. ژ بەر ھەبوونا پەکەکێ ب دەھان گوند ھاتنە ڤالاکرن.
ل گۆر راپۆرتا کۆمیسیۆنا لێکۆلینێ یا کو د تیرمەھا 2020ێ دا ژ ئالیێ پارلامەنتۆیا کوردستانێ ڤە ھاتیە ئەنجامدایین دا، د ھەیاما 28 سالێن بۆری دا 504 گوند ھاتنە ڤالاکرن، ژ بەر بۆمبەبارانا بەردەوام یا لەشکرێ ترکیێ ژی ب دەھان وەلاتیێن سڤیل ژیانا خوە ژ دەست دانە و ب ملیۆنان دۆلار زیانێن مادی چێبوونە.
