پارتیا دەمۆکراتا کوردستان – سووریا (پەدەکە-سە) راپۆرتا خوە یا سیاسی یا مەھا خزێرانێ بەلاڤ کر و تێدا بەحسا ژمارەیەک مژار و بابەتێن گرێدایی رەوشا سووریێ ب گشتی و یا رۆژئاڤایێ کوردستانێ ب تایبەتی و رەوشا ئیراق و ھەرێما کوردستانێ کریە .
پەدەکە-سێ د دەستپێکا راپۆرتا خوە دا رۆناھی خستیە سەر خراب بوونا رەوشێ ل سەرانسەری سووریێ ب گشتی د ھەموو واران دا؛ سیاسی، ئابووری، ئەولەھی و جڤاکی ب سەدەما درەنگ کەتنا دیتنا چارەسەریەکا سیاسی ژ بۆ سووریێ و ناکۆکیێن ناڤبەرا وەلاتێن زلھێز یێن کو دەستوەردانێ د سووریێ دا دکن مینا ئەمەریکا، رووسیا، ترکیا و ئیرانێ کو ھەر ئالیەک ل گۆری بەرژەوەندیێن خوە ھەماھەنگیێ و تەڤگەرێ دکە .
ھەروەھا راپۆرتا پەدەکە-سێ بەحسا لاوازبوونا رۆلا ئۆپۆزیسیۆنا سووریێ کریە و راگەھاندیە، رۆژ ب رۆژ ئۆپۆزیسیۆن بەر ب پاش ڤە ڤەدگەرە لەوما پێویستیا وێ ب دووبارە رێخستنێ ھەیە و لێڤەگەرەکێ د پەیوەندیێن خوە دا ل سەر ئاستا ناڤدەولەتی بکە، ب تایبەت وەلاتێن کو پشتەڤانیا وێ دکن.
دەربارێ رەوشا ناڤچەیێن کوردی ل رۆژئاڤایێ کوردستانێ پەدەکە-سێ د راپۆرتێ دا رۆناھی خستیە سەر خراب بوونا رەوشێ ب گشتی ژبەر بەردەوامیا کریزان، خراب بوونا رەوشا خزمەتگوزاری، نەبوونا ئەولەھی و ئارامیێ ب گشتی کو د دەما داویێ دا پرۆسەیێن دزیێ زێدە بوونە سەرباری بەردەوامیا رەڤاندنا زارۆکێن ژێر ھژدە سالی و ئەندامێن ئەنەکەسێ و مەترسیا کو د ناڤا وەلاتیێن کورد دروست بوویە ئەو ژی ب سەدەما گەفێن ترکیێ و ئەگەرا ئەنجامدانا ئۆپەراسیۆنەکا نوو ل سەر دەڤەرێ.
د داویا راپۆرتا خوە دا پارتیا دەمۆکراتا کوردستان – سووریا بەحسا ئێش و ئازارێن کوردان ل ھەر سێ ناڤچەیێن عەفرین، سەرێ کانیێ و گرێ سپی یێن رۆژئاڤایێ کوردستانێ یێن دبن کۆنترۆلا ترکیێ و کۆمێن چەکدار دا کریە و راگەھاندیە، رۆژ ب رۆژ ئاستا کریار و بنپێکرنێن کۆمێن چەکدار ژ گرتن، بنچاڤکرن، دەستەسەرکرن، سەپاندنا باجان ل ھەر سێ ناڤچەیان زێدەتر دبە، کو تا رۆژا ئیرۆ ئەو کریار و بنپێکرن بەردەوامن.
