په‌كه‌كێ كچه‌كا 15 سالی رەڤاند و بابێ وێ د دەما لێگەریانا وێ دا ژیانا خوە ژ دەست دا
بابێ کچەکا گەریلا یا كو هاتی رەڤاندن و ژ ئالیێ په‌كه‌كێ ڤە هاتیە ڤەشارتن، ب حەسرەتا دیتنا کچا خوە ل بلنداهییا چیایەکێ باژارێ سنە ژیانا خوە ژ دەست دا.
مالپەرا ئاڤا تۆدای راگەهاند، به‌ریا چه‌ند حه‌فتیان رێخستنێن په‌كه‌كێ کچه‌كا 15 سالی خاپاندبوو و ئەو برنە ناڤ رێزێن پارتیا ژیانا ئازادا کوردستانێ «پژاک» باسكێ په‌كه‌كێ یێ رۆژهلاتا كوردستانێ، پژاكێ هەموو زانیاریێن دەربارێ وێ كه‌چێ ژی ژ بابێ وێ ڤەشارتن.
بابێ وێ كه‌چێ یێ ب ناڤێ عابدین ناسری كو خه‌لكێ باژارێ سنه یه، د دەما لێگەریانێ ل كچا خوه، ژ بەر تێنیبوون و بێئاڤیێ ل چیایەکی بلندێ سنە دلێ وی راوەستیا و ژیانا خوە ژ دەست دا.
عابدین ناسری، وەک هەموو باب و دایکێن کو زارۆکێن وان ژ ئالیێ په‌كه‌كێ ڤە هاتینە رەڤاندن، وی چ جهـ و چیا نه‌هێلان كو لێ ل کچا خوە نه‌گه‌ریابیت، رۆژا پێنجشەمبا بۆری ئاگاهی گه‌هشتبوونێ كو كچا وی ل بلنداهیێن ناڤچەیا «کەلاتەرزان» یا سنەیە، ئەو ژی بەرێ خوە ددەته چیایێ «هەوارە بەرزە بەرقر» و ل كچا خوە دگەریت، لێ ژ بەر گەرمایا زێدە و نەبوونا ئاڤا ڤەخوارنێ، دلێ وی رادوەستیت و تەرمێ وی ژ ئالیێ خەلکێ گوندێ «بەرقر» ڤە دهێته دیتن.
یەک ژ مرۆڤێن عابدین ناسری دبێژیت: «خەلکێ رۆژهلات ژ دەست په‌كه‌كێ و پژاکێ بێزار بوونە، ئه‌ڤ رێخستنه زارۆکێن وان دبه‌نه بەشێن دی یێن کوردستانێ ب تایبەت ل باکور و رۆژئاڤا و وان دده‌نه کوشتن، په‌كه‌كه چ ئاگاهییان ده‌ربارێ زارۆکێن ره‌ڤاندی ناده‌ته مالباتێن وان، مالبات ژی دكه‌ڤنه عه‌زابه‌كا مه‌زن دا و ئه‌ڤ به‌لایه به‌رده‌وامه».
بەشەک ژ خەلکێ ناڤچەیا «کەلاتەرزان» داخواز دکه‌ن کو ئەو کارێ نائەخلاقی و دژی مرۆڤاتی یێ په‌كه‌كێ و پژاکێ بۆ میدیایێ بهێته راگەهاندن، خه‌لكێ رۆژهلات ب سه‌ده‌ما ڤان ره‌فتارێن په‌كه‌كێ و پژاكێ دیار دكه‌ن كو ئەگەر شۆرەش و تەکۆشین و خەبات وه‌ها بیت، خەلک بن دەستیا داگیرکەران باشترە.
