وەزارەتا پێشمەرگە راگھاند، سەرۆکەرکانێ وەزارەتا پێشمەرگە و بەرپرسێ تیما ئاساییشێ یا ئارتێشا ئامەریکایێ ل ھەرێما کوردستانێ ل سەر گھاندن و دابەشکرنا ئالیکاریێن سەربازی گۆتووبێژ کرن.
ل گۆر داخویانیا وەزارەتا پێشمەرگە، ئیرۆ چارەشەمێ 6ێ تیرمەھا 2022یێ، سەرۆکەرکان عیسا عوزێر پێشوازی ل بەرپرسێ تیما ئاساییشا ئامەریکایێ ل ھەرێما کوردستانێ کۆلۆنەل سانبۆرن و شاندا لگەلدا کر.
وەزارەتا پێشمەرگە ئاشکەرا کر، کۆلۆنەل سانبۆرن کورتەیەک ل سەر ناڤەندا ئۆپەراسیۆنا ھەڤبەش و چاوانیا کارووبار و ئەرکێن وێ ناڤەندێ پێشکێش کر، ھەروھا ب گرینگی بەحسا پرۆژەیێن چاکسازی و وەزارەتا پێشمەرگە کر.
سانبۆرن دیار کر، ئەو ئالیکاریا پرۆژەیا چاکسازی یا وەزارەتا پێشمەرگە دکن، ئەزموونا شێورمەندێ خوە ژی ب ئاوایەکێ پرۆفیشنال د ڤی واری دا دگھینن.
ل گۆر داخویانیا وەزارەتا پێشمەرگە، شاندا ئامەریکایێ و وەزارەتا پێشمەرگە بەحسا چاوانیا گھاندن و دابەشکرنا ئالیکاریێن سەربازی کرن.
سەرۆکەرکانێ وەزارەتا پێشمەرگە تەکەز کر، ھێزێن پێشمەرگە ب رێیا راھێنان و پەروەردەیێن بەردەوام، ئاست و شیانێن وانێن سەربازی تێن بلندکرن و ژ بۆ ڤێ مەبەستێ ژی سەرۆکەرکانی ل سەر بنگەھا تەۆریێن سەربازی یێن نوو یێن راھێنانێ، نەخشەرێیەکە نوو ب ھەڤکاریا شارەزایێن وارێ راھێنانێ یێن ھێزێن ھەڤپەیمانان ئامادە دکە.
