فەرمانداریا ئۆپەراسیۆنێن ھەڤبەش راگھاند، شاندەکێ بلند یێ ئەولەکاریا ئیراقێ ئیرۆ گھیشت ھەرێما کوردستانێ و بریارە لگەل بەرپرسێن وەزارەتا پێشمەرگە بجڤە.
ئاژانسا نووچەیان یا ئیراقێ (INA) بەلاڤ کر، فەرماندارێ ئۆپەراسیۆنێن ھەڤبەش فەریق روکن «حامد عەبدولمەقسوود» لگەل فەرماندارێ ھێزێن بەژایی فەریق روکن «قاسم محەمەدی» و ھەژمارەکا دن ژ فەرماندارێن لەشکەری گھیشتن ھەولێرێ.
دیار کر ژی، ئارمانجا ڤێ سەردانێ، کۆمبوونا ل گەل سەرۆکەرکانێ پێشمەرگەیە، ژ بۆ گۆتووبێژکرنا رەوشا ئەولەھیێ ل ناڤچەیێن کو ژ بۆ ھەر دو ئالیان گرینگن و شۆپاندنا زانیاریێن ئستخباراتی و ئەولەھیێ.
وەزارەتا پێشمەرگەیا ھەرێما کوردستانێ بەری چەند رۆژان د داخویانیەکێ دا دیار کربوو، ژ بۆ تێکبرنا تەرۆریستان، د ھەموو وان ئۆپەراسیۆنێن ھەڤبەشێن د ناڤبەرا پێشمەرگە، ئارتێشا ئیراقێ و ھێزێن ھەڤپەیمانان دا کو ھاتنە کرن، ئارمانجێن مەزن ب دەست ھاتن.
